Палітвязня-выдаўца Канстанціна Залатых накіравалі адбываць прысуд у наваполацкую ПК-1
У наваполацкую папраўчую калонію № 1 з мінскага СІЗА былога дырэктара газеты «Белорусы и рынок», асуджанага на чатыры гады калоніі, перавялі яшчэ 21 ліпеня — праз два з паловай тыдні пасля разгляду апеляцыйнай скаргі палітвязня ў Вярхоўным судзе, піша БАЖ.
Канстанцін Залатых. Фота: сацсеткі
13 ліпеня КДБ Беларусі дадаў Канстанціна ў спіс асоб, датычных да «тэрарыстычнай дзейнасці». Гэта азначае, што яму забаронена атрымліваць у калоніі грашовыя пераводы. Наўздагон, 21 ліпеня, МУС унесла палітвязня ў спіс «экстрэмістаў».
Канстанціна Залатых затрымалі 18 мая 2022 года. Яго асудзілі на чатыры гады калоніі па наступных абвінавачаннях:
- арт. 369 — «Абраза прадстаўніка ўлады»;
- арт. 368 — «Абраза Лукашэнкі»;
- арт. 130 — «Распальванне варожасці ці варажнечы»;
- арт. 426 — «Перавышэнне ўлады ці службовых паўнамоцтваў».
Падтрымайце палітвязня: ПК №1, 211440, Наваполацк, Тэхнічная, 8, Канстанцін Уладзіміравіч Залатых.
Каментары