У Кобрыне зноў выставілі на продаж будынак адной з найбуйнейшых сінагог Беларусі — помнік XVIII стагоддзя. Будынак прадаецца за даўгі кампаніі «Жылбудкамплект», вядомай незавершаным жылым праектам у Мінску. Цяпер аб’ект з’явіўся на пляцоўцы «БелЮрЗабеспячэнне», а яго кошт істотна зменшыўся, піша «Смартпрэс».
Сінагога знаходзіцца на вуліцы Першамайскай, 40. Плошча будынка складае больш за тысячу квадратных метраў. Гэта каменнае культавае збудаванне з мансардай і прыбудовамі. Будынак доўгі час не выкарыстоўваецца і знаходзіцца ў занядбаным стане, аднак мае статус гісторыка-культурнай каштоўнасці.
Сінагога была пабудавана ў XVIII стагоддзі, калі яўрэйская абшчына складала значную частку насельніцтва Кобрына. Да вайны ў горадзе дзейнічала больш за сем сінагог, але пасля Другой сусветнай захавалася толькі гэтая. Падчас нямецкай акупацыі будынак стаў цэнтрам гета, куды зганялі яўрэяў з наваколля.
Пасля вайны сінагога перастала выкарыстоўвацца па рэлігійным прызначэнні: каштоўнасці вывезлі, а памяшканні прыстасавалі пад гаспадарчыя патрэбы. У розныя гады тут размяшчаліся вытворчыя аб’екты, а ў 1980‑х у будынку працаваў цэх выпуску піва і безалкагольных напояў Кобрынскага кансервавага завода. З 1990‑х гадоў будынак пачаў паступова разбурацца.
Раней абмяркоўваліся планы аднаўлення сінагогі — меркавалася тут стварыць культурны цэнтр яўрэйства Заходняй Беларусі, музей гісторыі і этнаграфіі, а таксама дзейную сінагогу, але гэтыя задумы так і не былі рэалізаваныя.
Прычына продажу — фінансавыя праблемы былога ўласніка. Кампанія «Жылбудкамплект» не выканала абавязацельствы перад сотнямі дольшчыкаў у Мінску, пасля чаго яе кіраўнікі былі асуджаныя, а маёмасць выстаўленая на таргі.
Разам з будынкам новы ўласнік атрымае зямельны ўчастак плошчай 57 сотак, які можна выкарыстоўваць толькі для рэлігійных (культавых) мэт. Электронныя таргі прызначаныя на 3 лютага, пачатковая цана складае 122 тысячы рублёў — значна менш, чым летась, калі сінагогу спрабавалі прадаць за 600 тысяч.
На радзіме апошняга караля Рэчы Паспалітай прадаюць будынак былой плябаніі
Пад Валожынам на продаж выставілі прыбіральню-шпакоўню. Просяць 2280 рублёў
Будынак былога кляштару ў Глыбокім зноў выставілі на аўкцыён
Гістарычны будынак прадаюць за 42 рублі ва Ушацкім раёне
Гэты будынак у Баранавічах прадавалі за адну базавую, але цана на аўкцыёне скокнула да $40 тысяч
Цяпер чытаюць
Дзмітрый Семчанка: Я прыйшоў у пул Лукашэнкі біцца з Расіяй21
Каментары