Незвычайны дом у выглядзе карабля знаходзіцца ў вёсцы Вялікая Валахва Баранавіцкага раёна. Цяпер яго прадаюць, заўважыла мясцовае выданне Bar24. Аб'ява аб продажы незвычайнага аб'екта нерухомасці з'явілася 29 жніўня.
Брусчаты дом у форме карабля быў пабудаваны ў вёсцы Вялікая Валахва ў 2013 годзе. Ён драўляны, аднапавярховы, агульная плошча — 110 квадратных метраў.
Незвычайная ў гэтым будынку не толькі яго форма. Усе вокны ў доме круглыя і нагадваюць ілюмінатары.
У аб'яве гаворыцца, што ў будынку ёсць усе неабходныя для камфортнага жыцця камунікацыі.
«Усё вельмі дагледжана і з любоўю. Дом-карабель можна здаваць у арэнду для правядзення святаў, для адпачынку ў лазні і г. д», — піша аўтар аб'явы.
Дом прадаецца за 70 000 даляраў у эквіваленце, уладальнік гатовы разгледзець варыянты абмену.
Каментары