Зяленскі заявіў, што пойдзе на наступныя прэзідэнцкія выбары, калі яны адбудуцца
У інтэрв'ю партугальскаму тэлебачанню RTP прэзідэнт Украіны сказаў, што будзе зноў балатавацца ў кіраўнікі дзяржавы ў тым выпадку, калі выбары адбудуцца ў 2024 годзе падчас вайны, хаця раней ён хацеў абмежавацца адным тэрмінам.
«Калі будзе працягвацца вайна і будуць выбары, я ніколі ў жыцці не кіну сваю дзяржаву. Таму што я гарант Канстытуцыі і ў любым выпадку буду яе абараняць», — сказаў ён.
Зяленскі падкрэсліў, што правядзенне выбараў павінна быць аплачана заходнімі партнёрамі і што неабходна вырашыць пытанне бяспекі ва Украіне і ўмоў галасавання для бежанцаў.
Згодна з Канстытуцыяй Украіны, парламенцкія выбары ў краіне павінны адбыцца восенню 2023 года, а прэзідэнцкія — у сакавіку 2024 года. Аднак заканадаўства забараняе праводзіць выбары ва ўмовах ваеннага становішча.
Прадстаўнікі Захаду выступаюць за тое, каб выбары ва Украіне прайшлі своечасова, нягледзячы на вайну.
Каментары