Пяць беларускіх артыстаў, якіх вы можаце не ведаць, але іх слухаюць сотні тысяч
Выданне «Клік» прэзентавала спіс найпапулярнейшых у Spotify беларускіх музыкаў, і там хапае малавядомых шырокаму колу імёнаў. Разбіраемся, якіх беларусаў слухае свет.
Аўтары КЛІКа складалі рэйтынг на аснове адкрытых даных адносна таго, колькі слухачоў штомесяц маюць у Spotify беларускія артысты. Яны прызнаюцца, што ў гэтай версіі спіса прапусцілі некаторых выканаўцаў, але ж рэйтынг КЛІКа ўсё роўна дае глебу для разваг — галоўным чынам за кошт таго, што ў ім багата імёнаў, пра якія вы маглі і не чуць.
Спачатку — пра больш вядомых з топ-10. З лічбай амаль у 2,5 мільёна слухачоў штомесяц рэйтынг узначальвае пастпанкавы гурт «Молчат дома». Макс Корж і яго 809 тысяч слухачоў штомесяц займаюць чацвёртую пазіцыю рэйтынга, на наступным месцы — Ціма Беларускіх і 730 тысяч слухачоў. Сёмае месца займае ЛСП, які мае 523 тысячы слухачоў, дзявятае — «Бі-2» і 369 тысяч слухачоў штомесяц.
Расказваем пра менш вядомыя імёны з топ-10 спіса.
OBLXKQ (1223000 слухачоў штомесяц)
У сваёй афіцыйнай суполцы УК гэты артыст пазначае сябе так: «Малады музыкант з Беларусі, для якога няма рамак у гучанні». За псеўданімам-абрэвіятурай (яна чытаецца як «Облако») хаваецца 21-гадовы Аляксандр з мястэчка Гродзенскай вобласці, які стварае электронную музыку апошнія пару гадоў.
У 2018-м Саша скончыў школу і паступіў у Гродзенскі аграрны ўніверсітэт на агранома. Тады ён і пачаў цікавіцца атмасфернай электроншчынай і саўндтрэкамі з кінафільмаў. Хлопец пачаў сачыць за творчасцю іншага беларуса — Lxst Cxntury (Ласт Сенчуры) — і ў нейкі момант вырашыў, што і сам зможа ствараць такую музыку. Першы трэк ён загрузіў у тыкток у ліпені 2021-га падчас практыкі ў вёсцы на Берасцейшчыне, і той заляцеў у рэкамендацыі тыктоку. Яго абноўленая версія пад назвай Endless Love, створаная разам з расійскім калегам DVRST, атрымала 23 мільёны праслухоўванняў на Spotify.
Гродзенскі аграрны беларус у выніку кінуў за некалькі месяцаў да дыплома. Цяпер ён зарабляе музыкай, і асноўная частка даходу прыходзіць з праслухоўванняў на платформах Spotify, Youtube, «Яндекс Музыка». Часам, як прызнаецца хлопец, атрымоўваецца заробак як у беларускага айцішніка.
Findmyname (854000 слухачоў штомесяц)
Трэцяя пазіцыя ў спісе — і зноў стваральнік электроннай музыкі. Гэты артыст называе сябе ў Spotify «музыкантам, бітмэйкерам і саўндпрадзюсарам з Мінска». Ён працуе ў жанры «фонк» (гэта паджанр хіп-хопа), і беларус не толькі піша музыку, але і танцуе.
Сапраўднае імя музыкі — Валерый Мурашка. У яго цікавая гісторыя: Валерый адпрацаваў і грузчыкам, і перакупшчыкам аўтамабіляў, і кур'ерам, даводзілася яму і выкладаць танцы. Пасля эміграцыі і вяртання дахаты хлопец не змог знайсці ў Беларусі працу і падышоў да рашэння праблемы нестандартна: ён зрабіў тыкток-акаўнт і пачаў ствараць гук для рэпераў.
Два месяцы ролікі ў акаўнце набіралі каля тысячы праглядаў, пакуль Findmyname не зладзіў рэмікс на «Калыханку», і трэк стаў папулярным. З гэтага і пачалася яго папулярнасць.
ROMANTICA (674000 слухачоў штомесяц)
Гэты 28-гадовы музыкант называе сябе шматжанравым артыстам і, відаць, ніколі не здымае публічна сваю маску. Як і мінулы выканаўца, ROMANTICA таксама робіць фонк, як і OBLXKQ i Findmyname, супрацоўнічае з беларускім лэйблам GOOST MUSIC.
Адным са сваіх любімых выканаўцаў ROMANTICA называе гурт Linkin Рark, а таксама адзначае свой вобраз як адзін са сваіх моцных бакоў. І гэта сапраўды запамінальны вобраз — глядзіце самі.
Nikitata (465000 слухачоў штомесяц)
Зноў прэзентуем вам артыста з лэйбла GOOST MUSIC. Мікіта (гэтае імя хаваецца пад псеўданімам) нарадзіўся ў вайсковым гарадку Печы. У дзяцінстве ён хацеў паўтарыць шлях брата, які займаўся біятлонам і лыжамі, і хадзіў трэніравацца ў яго спартовую школу, а потым год займаўся дзюдо і нават думаў самарэалізоўвацца ў беларускай арміі.
Што да музыкі, то Мікіта зацікавіўся ёй у школьныя гады і пачаў хадзіць на ўрокі гітары. Спачатку засяродзіўся на ігры на інструменце, а ў старэйшых класах пачаў пісаць каверы і ствараць уласныя песні.
Мікіта вучыўся ў Мінскім дзяржаўным каледжы мастацтваў на аддзяленні народнай творчасці і інструментальнай музыкі, а таксама зладзіў з сябрамі тыкток-хаус. Вось адзін з іх тагачасных ролікаў.
Сябе Мікіта прасоўваў праз тыкток, а яшчэ яму пашчасціла трапіць у праграму падтрымкі маладых артыстаў Radar ад Spotify. Nikitata выпускае спакойныя трэкі, але прызнаецца, што сам любіць слухаць цяжкую музыку, напрыклад, Slipknot.
УННВ (316000 слухачоў штомесяц)
Гэты гурт з Мінска працуе ў жанрах андэграўнднага хіп-хопа і рэпа. Назвы іх песень могуць уразіць, вось некалькі прыкладаў: «Забітыя, але не вамі», «Пакуль тлее гашыш», «Лісты забітага чалавека»», «Вусны ў памадзе размазаныя капуста».
УННВ спявае пра суровыя рэаліі жыцця, залежнасць і наркотыкі. Але яны не агітуюць за дрэнныя звычкі, а, хутчэй, расказваюць пра тое, якім цяжкім гэтыя звычкі робяць жыццё. Часам фанаты УННВ прызнаюцца, што творчасць гурта ратуе іх ад залежнасці і іншых праблем.
Музыкі наследуюць традыцыі андэграўнду: не выпускаюць кліпаў, не займаюцца ўласным прасоўваннем і не ўзаемадзейнічаюць з медыя. Гледзячы на іх статыстыку ў Spotify, у іх і без гэтага атрымліваецца няблага.
«Наша Нiва» — бастыён беларушчыны
ПАДТРЫМАЦЬ
«Мой каханы не чытае навіны, калі яны напісаныя па-беларуску». Дар'я Царык стала на абарону рускай мовы і прыпляла нават Пазняка48
Каментары