Гарадзенца асудзілі за публікацыю звестак пра сем'і супрацоўнікаў РАУС пасля бытавога канфлікту з імі на лесвіцы
Паўла Голава асудзілі да пазбаўлення волі ў калоніі паводле ч. 2 арт. 203-1 (незаконныя дзеянні ў дачыненні да інфармацыі аб прыватным жыцці і персанальных звестках) і арт. 188 (паклёп) Крымінальнага кодэкса.
Дакладны тэрмін невядомы, але мужчыну вызвалілі з-пад варты, бо да суда ён знаходзіўся пад вартай і цалкам адбыў прызначаны тэрмін. Таксама ён мусіць выплаціць штраф, яго памер таксама невядомы, піша «Вясна».
Вырак агучыў у судзе Кастрычніцкага раёна суддзя Віталь Лабоцкі. Ён прызнаў Голава вінаватым у тым, што той размясціў у тэлеграм-чаце інфармацыю пра супрацоўнікаў Кастрычніцкага РАУС Гродна, якія «могуць арганізоўваць правакацыі, канфліктныя сітуацыі ці аператыўнае назіранне, а таксама адбіраць у дзяцей тэлефоны».
Павел прызнаў віну часткова. Ён распавёў пра бытавы канфлікт на лесвічнай пляцоўцы з дзвюма сем'ямі — чатырма супрацоўнікамі РАУС, якія жывуць з ім у адным доме.
Сітуацыю здымаў на тэлефон сын Голава, гэта не спадабалася супрацоўнікам РАУС, таму, калі тэлефон упаў на падлогу, адзін з іх паспрабаваў яго забраць. Голаў звярнуўся ў міліцыю, але, калі не атрымаў даных пра разгляд заявы, размясціў відэазапісы канфлікту і фотаздымкі ўдзельнікаў у чаце.
Вядома, што ў Голава двое дзяцей.
Каментары