«Гэта словы вельмі, вельмі значныя». Дональд Туск перад зваротам да польскага прэзідэнта ўспомніў пра твіт беларуса Слюнькіна
Кіраўнік польскай апазіцыі Дональд Туск у сваім выступленні па выніках парламенцкіх выбараў, якія прайшлі ў Польшчы 15 кастрычніка, сярод іншага працытаваў допіс у твітары былога беларускага дыпламата Паўла Слюнькіна пра важнасць таго, што адбылося цяпер у гэтай краіне
«Мне 34 гады, я беларус, жыву ў выгнанні ў Польшчы.
Упершыню ў сваім жыцці я ўбачу мірную перадачу ўлады. Да апазіцыі. Пасля дэмакратычных выбараў. Пры яўцы 73% выбаршчыкаў.
Маё пасланне вам — шануйце і абараняйце сваю дэмакратыю. Вы нават уявіць сабе не можаце, які цуд у вас ёсць», — напісаў Слюнькін.
Гэты допіс сабраў больш за 11 тысяч рэпостаў і 3 мільёны праглядаў.
«Малады беларус, які знаходзіцца ў эміграцыі тут, у Польшчы, ён уцёк ад Лукашэнкі, напісаў сёння да нас, да палякаў такія словы, каб мы цанілі гэта, каб дбалі, як толькі можам, пра дэмакратыю. Як напісаў, першы раз у жыцці пабачыў нешта такое, такая яго развага, што магчымая мірная перадача ўлады, што апазіцыя прымае ўладу. Гэта ўсё словы вельмі, вельмі значныя», — адзначыў Туск.
Пасля гэтага ён звярнуўся да прэзідэнта Польшчы Анджэя Дуды, каб той як мага хутчэй прыняў адпаведныя рашэнні і ініцыяваў працэс стварэння новага ўрада, кіраванага цяперашняй апазіцыяй. Раней з'явілася паведамленне, што Дуда, нягледзячы на агульную перамогу апазіцыі, збіраецца ўсё ж такі прапанаваць фармаваць урад лідару партыі «Права і справядлівасць» Яраславу Качыньскаму.
Рыжанкоў: Бачыў, нехта там пісаў пра нейкія правы чалавека. У ААН да Беларусі прэтэнзій няма2
Каментары