Міхаіла Лапунова асудзілі да адміністрацыйнага арышту пяты раз запар
Гамельчука Міхаіла Лапунова, бацьку палітычнага зняволенага Мікіты Залатарова, зноў асудзілі ў судзе Цэнтральнага раёна горада Гомеля. Гэта ўжо пяты 15-суткавы прысуд гэтаму чалавеку, паведаміла «Гомельская вясна».
Тэрмін чацвёртага адміністрацыйнага арышту павінен быў скончыцца 9 кастрычніка, але замест волі Міхаіл Лапуноў чарговы раз быў асуджаны па частцы 2 артыкула 19.11 КаАП Беларусі «Распаўсюджванне інфармацыйнай прадукцыі, уключанай у рэспубліканскі спіс экстрэмісцкіх матэрыялаў, а таксама выраб, выданне, захоўванне або перавозка з мэтай распаўсюджвання такой інфармацыі».
Суддзя Алеся Осіпава зноў прызнала мужчыну вінаватым у распаўсюдзе «экстрэмісцкіх» матэрыялаў і прызначыла новае пакаранне ў выглядзе 15 сутак адміністрацыйнага арышту.
Падтрымаць зняволенага Міхаіла Рыгоравіча Лапунова можна паштоўкамі і лістамі, даслаўшы іх на адрас: ІЧУ, вул. Міжгародняя, д. 26, г. Гомель, 246144.
Сын Міхаіла — Мікіта — ці не наймаладзейшы з затрыманых у выніку пратэстаў 2020 года. На той момант 16-гадовага Мікіту, хворага на эпілепсію, абвінавацілі ажно паводле трох артыкулаў Крымінальнага кодэкса і асудзілі на 5 гадоў выхаваўчай калоніі.
Пазней на хлопца завялі яшчэ адну крымінальную справу — за тое, што ён нібыта напаў на супрацоўніка СІЗА і пагражаў яго родным.
Агульны тэрмін пакарання для Мікіты склаў 4 гады і 6 месяцаў выхаваўчай калоніі.
Цяпер чытаюць
Адцісканні з татам, урокі з мамай. Як жыве і вучыцца сям’я Севярынцаў у Вільні6
Каментары