Аляксандр Лукашэнка сёння падчас наведвання Мінскага раёна зрабіў некалькі заяў, у тым ліку і пракаментаваў вынікі парламенцкіх выбараў у Польшчы.
Аляксандр Лукашэнка ў сваіх выказваннях трымаўся агульнай канвы ўстановак расійскай прапаганды. Але ў частцы, прысвечанай адносінам з суседзямі і Захадам, у яго заявах чыталася гатоўнасць аднавіць размовы.
«Малайцы палякі. Вось я гэтага варыянту не чакаў. Яны проста не сталі ў гэтую гульню з гэтымі апісанымі «пісаўцамі» гуляць (кіроўная партыя «Закон і справядлівасць» (PiS), якая страціла большасць у парламенце. — НН), — казаў Лукашэнка. — Ну палякі, я вось хвалю народ Польшчы. Малайцы! Яны ўцерлі ім нос. І апазіцыю да ўлады фактычна прывялі. Ужо Польшча будзе не тая. Няхай гэта не нашы людзі там [ва ўладзе], не настроеныя з намі размаўляць, але гэта іншыя людзі (тут і далей цытаты паводле БелТА. — НН)», — сказаў Лукашэнка.
У той жа час Аляксандр Лукашэнка працягвае прапагандысцкую гульню вакол нелегальных мігрантаў, якія ідуць у Еўропу праз Беларусь.
«Не Лукашэнка гэтых мігрантаў туды цягнуў, а яны, бо яны на гэтым зарабляюць».
Ëн таксама працягваў крытыкаваць улады Літвы і Латвіі.
«Літоўцы, латышы — нармальныя людзі. Не пашанцавала з кіраўнікамі, што тут казаць. Але гэта іх праблема. Я думаю, што літоўцы, латышы найбліжэйшым часам на выбарах і гэтую праблему вырашаць».
Пры гэтым ён падкрэсліў, што беларусы не хочуць ваяваць.
«Паціскаем рукі і будзем паціскаць тым, хто хоча жыць з намі ў міры. Мы ваяваць не хочам. Вы ведаеце, мы можам адказаць. У нас ёсць чым адказаць як ніколі», — сказаў Лукашэнка.
«Але мы не хочам ваяваць. Бо гэты адказ дорага нам абыдзецца. Трэба разумець: у выпадку сутыкнення людзі загінуць і з таго, і з другога боку. Таму мы ваяваць не хочам, мы хочам жыць мірна», — заключыў Аляксандр Лукашэнка.
На выбарах у Польшчы, што прайшлі 15 кастрычніка, кіроўная кансерватыўна-нацыяналістычная партыя «Закон і справядлівасць» (PiS), якая была ва ўладзе з 2015 года, заняла першае месца, але большасць галасоў сабралі апазіцыйная кааліцыя ў складзе ліберальна-кансерватыўнай «Грамадзянскай кааліцыі», цэнтрыстаў «Трэцяга шляху» і «Лявіцы». Як чакаецца, яны і сфармуюць урад, гэта адбудзецца да канца года.
Адносіны прарасійскай Адміністрацыі Аляксандра Лукашэнкі з Польшчай, Літвой і Латвіяй, як і Украінай, вельмі кепскія. Яны сапсаваліся пасля 2020 года, калі Мінск распачаў антызаходнюю і антыеўрапейскую кампанію, каб пераключыць увагу грамадства пасля сфальсіфікаваных выбараў. Яны пагоршалі яшчэ больш пасля прымусовай пасадкі лайнера «Раянэйр» у маі 2021 года. Пасля была спроба гнаць нелегальных мігрантаў на мяжу, што Польшча і Літва расцанілі як гібрыдную атаку. Акрамя таго, былі разгромленыя арганізацыі нацыянальных меншасцяў і арыштаваныя польскія актывісты. У Беларусі таксама нарасталі рэпрэсіі, якія ішлі ў пары з ашалелай антызаходняй, антыпольскай і антыўкраінскай прапагандай. Пасля ж таго, як з тэрыторыі Беларусі і пры падтрымцы Мінска Расія напала на Украіну, яны ўвогуле звяліся да мінімуму.
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?8282
Каментары