Музыкантам Tor Band вынеслі суровыя прысуды. Яўген Бурло падчас абвяшчэння прысуду не змог устаць
Стаў вядомы прысуд музыкам Tor Band, піша «Гомельская вясна».
Дзмітрыю Галавачу прысудзілі 9 год узмоцненага рэжыму і 100 базавых велічынь штрафу (3700 рублёў). Таксама ў даход дзяржавы ў мужчыны канфіскавалі ноўтбук і тэлефон.
Яўген Бурло атрымаў 8 год узмоцненага рэжыму і 3700 рублёў штрафу. Таксама ў яго канфіскавалі мабільны тэлефон.
Андрэя Ярэмчыка асудзілі на 7,5 года ўзмоцненага рэжыму і 3700 рублёў штрафу. Яго мабільны тэлефон таксама пойдзе ў даход дзяржавы.
Як стала вядома «Свабодзе», на прысудзе, які быў адкрытым, былі сваякі музыкаў.
«Яны ўсе плакалі падчас прысуду. Адна са сваячак у час агучвання прысуду страціла прытомнасць. Яўген Бурло быў на мыліцах, ён з цяжкасцю перасоўваецца. Ён нават не ўставаў падчас абвяшчэння прысуду — суддзя Сяргей Салоўскі яму дазволіў», — расказала «Свабодзе» крыніца.
Музыкаў, чые песні сталі сімвалам пратэсту ў 2020 годзе, абвінавачвалі ў распальванні варожасці, стварэнні экстрэмісцкага фарміравання або ўдзеле ў ім, дыскрэдытацыі Рэспублікі Беларусь, абразе Лукашэнкі. Яны былі затрыманыя ў канцы кастрычніка 2022 года.
Цяпер чытаюць
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком23
Каментары