Здаецца, у сацсетках набывае папулярнасць новы жанр: абураныя беларусы ў тыктоку скардзяцца на праблему Лукашэнку. Цяпер да гэтага падключыліся чыноўнікі: яны сталі запісваць відэаадказы.
У гэты раз зварот да Лукашэнкі ў сацсеткі выклалі дольшчыкі дома нумар 11 у новым мікрараёне Лядзішча-2 горада Барысава.
— Нас больш за 119 сем'яў, 95% сем'яў шматдзетныя, дзяржаўныя служачыя і людзі, якія маюць патрэбу ў паляпшэнні жыллёвых умоў, — кажа жанчына ў кадры (у тыктоку яна падпісана як шматдзетная маці са стажам і жонка ваеннага). — Просім вас дапамагчы нам у няпростай сітуацыі. У лістападзе 2021 года мы пачалі будаваць наш дом, забудоўшчыкам якога з'яўляецца кіраванне капітальнага будаўніцтва (ККБ) Барысаўскага раёна. Больш за два гады мы спраўна выконвалі свае абавязацельствы, штомесяц аплачваючы выстаўленыя нам унёскі.
Жанчына сцвярджае, што за два гады ККБ Барысаўскага раёна больш за пятнаццаць разоў пераносіла тэрміны здачы дома. Пры гэтым, яго прадстаўнікі ставілі ўльтыматум: калі нехта не падпіша чарговую дадатковую згоду, то з ім дамову долевага будаўніцтва ўвогуле разарвуць.
— Цяпер наш дом гатовы на 100%, але чарговы перанос здачы дому ККБ Барысаўскага раёна рыхтуецца зрабіць на 27 снежня 2023 года. Шмат каму з нас пасля Новага года не будзе дзе жыць і мы будзем вымушаны ісці на вуліцу.
Жанчына сцвярджае, што дольшчыкі напісалі шмат зваротаў, але на чыноўнікаў яны ніяк не паўплывалі.
За чатыры дні гэта відэа паглядзелі больш за 400 тысяч разоў. Негатыўных каментароў сабралася шмат. Вось так выглядае даволі тыповы: «Купіце гатовыя кватэры. У чым праблема? Я б увогуле гэтыя льготы адмяніў, не хачу, каб з маіх падаткаў камусьці халяўнае жыллё будавалі».
Але, здаецца, сярод гледачоў былі і чыноўнікі. Бо відэадказ праз два дні запісаў намеснік старшыні Барысаўскага райвыканкама Сяргей Бабура. Ён сцвярджае, што той самы дом гатовы на 98% і праца ў ім вядзецца згодна з планам. Чыноўнік паабяцаў, што да канца лістапада дом будзе здадзены. У адным з каментароў пад відэа абураюцца: «Я гляджу толькі для шматдзетных жытло ў Барысаве будуюць. А іншыя людзі як?».
Раней з аналагічным зваротам да Лукашэнкі звярталіся дольшчыкі дома ў сталічным мікрараёне Лошыца-7. Пасля гэтага Лукашэнка вырашыў паказальна разабрацца і званіў мэру Мінска, каб дом дабудавалі. Пазней людзі выклалі ў тыктоку відэападзяку з хэштэгамі #любимуюнеотдают і #нашпрезидент. Трэба адзначыць, што акаўнт жанчыны, якая апублікавала відэа (яна ж і прамаўляе ў кадры) цалкам складаецца з рэпостаў прапагандысцкіх навін і афіцыйных фэйкаў.
Цяпер чытаюць
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе18
Каментары