Беларускае аддзяленьне РНЕ адмаўляе сваю датычнасьць да "замініраваньня" сядзібы БНФ.
Беларускае рэгіянальнае аддзяленьне Расейскага нацыянальнага адзінства (РНЕ) ня мае ніякага дачыненьня да інцыдэнту ля офісу Партыі БНФ. Невядомае прыстасаваньне, што нагадвала выбухоўку, было знойдзена ля офісу партыі ў сераду раніцай, 16 жніўня. Унутры муляжа выбуховага прыстасаваньня знаходзілася эмблема РНЕ.
Беларускае аддзяленьне незарэгістраванай арганізацыі РНЕ распаўсюдзіла заяву, у якой гаворыцца: «16 жніўня 2006 г. у Інтэрнэце зьявілася інфармацыя пра знойдзенае ля офісу Партыі БНФ прыстасаваньня падобнага на выбуховае і датычнасьці да гэтага інцыдэнту арганізацыі РНЕ. У сваю чаргу, кіраўніцтва Беларускага рэгіянальнага аддзяленьня адмаўляе датычнасьць да гэтага інцыдэнту», -- гаворыцца ў заяве.
У сераду, 16 жніўня, сапёры з дапамогай спэцабсталяваньня і службовага сабакі адсьледавалі памяшканьня офісу апазыцыйнай партыі. Інфармацыя, што ў офісе закладзена выбуховае прыстасаваньне, не пацьвердзілася.
«Я расцэньваю гэта адназначна як акт тэрарызму, скіраваны супраць Партыі БНФ. Цяпер відавочна, супраць каго ў нашай краіне скіраваны тэракты. Гэтыя людзі і раней зьдзяйсьнялі брудныя ўчынкі – аблівалі смалой дзьверы офісу партыі, пісалі на асфальце побач з уваходам свае лёзунгі. Мы неаднаразова зьвярталіся на гэты конт у міліцыю, аднак гэтыя людзі не былі знойдзеныя, хоць побач разьмяшчаецца Акадэмія МУС, ходзяць міліцэйскія патрулі», - заявіў старшыня партыі БНФ Вінцук Вячорка.
На думку намесьніка старшыні Партыі БНФ Аляксея Янукевіча, здарэньне, што пацягнула за сабой выклік сапёраў, можа стаць пачаткам кампаніі па пазбаўленьні партыі офісу ў цэнтры Менску.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда17
Каментары