Вайсковы эксперт дае прагноз па сітуацыі на фронце ва Украіне на наступны год
Вайсковы эксперт Алег Жданаў у сваім стрыме ацаніў суадносіны расійскіх і ўкраінскіх сіл на фронце і акрэсліў перспектывы 2024 года.
Як адзначае Жданаў, за год суадносіны вернутых і страчаных Украінай тэрыторый прыкладна аднолькавыя. Але 2023 год у адрозненне ад 2022-га адзначыўся карэнным пераломам у ходзе самой вайны.
«Галоўнае дасягненне 2023 года — пазбаўленне расійскай арміі здольнасці праводзіць наступальныя аперацыі аператыўна-тактычнага ўзроўню і аператыўнага ўзроўню. Як распавёў сам Шайгу на калегіі Міністэрства абароны Расіі, у 2023 годзе страты расійскай арміі павялічыліся ў паўтара раза», — заўважае Жданаў.
Расійскія ўлады не даюць канкрэтнай лічбы сваіх стратаў.
«З тактычнага пункту гледжання расійскі бок спрабуе атакаваць па ўсёй лініі фронту. Цяпер ідзе інэрцыйны этап — паўзучы наступ, пры якім яны маюць частковы поспех на асобных участках аператыўных напрамкаў і прасоўваюцца на адну-дзве пазіцыі — на 100, 200, 300 метраў.
Толькі на Бахмуцкім напрамку за ўсю восень было 300-500 метраў. І гэта пры тым, што яны нясуць кратна большыя страты. Напрыклад, за тыдзень — 11 батальёнаў. Пад Бахмутам было 20 тысяч забітых і каля 50 тысяч санітарных страт», — гаворыць Жданаў.
На погляд аналітыка, так званы паўзучы наступ доўга не працягнецца, бо «палітычныя тэндэнцыі 2024 года не даюць Крамлю магчымасці абвясціць другую хвалю мабілізацыі», а тая колькасць людзей, якая «выцягваецца з ваенкаматаў», не пакрывае стратаў на фронце.
Жданаў адзначае, што на сёння на акупаванай тэрыторыі Украіны разгорнута да 34 тысяч чалавек Расгвардыі. У іх галоўную задачу на 2023 год уваходзіў адлоў дызерціраў і ўтрыманне пад вартай тых, хто адмовіўся ісці ваяваць. Акрамя гэтага з'явіліся амаль што штатныя заградатрады.
Украіна, на погляд аналітыка, за 2023 год вырасла ў агнявой магутнасці і пераламіла ў палітычным плане Захад, прымусіўшы яго пераацаніць галоўныя сэнсы вайны. Цяпер там разумеюць неабходнасць павелічэння паставак узбраення, каб Украіна была ў стане нанесці разгром расійскай арміі. З палітычнага пункту гледжання гэта будзе перамога Захаду.
Перспектывы 2024 года
Па словах Жданава, на надыходзячы год Украіна рыхтуе маштабны наступ. Пры гэтым «другі раз наступаць на тыя ж граблі ніхто не будзе». Наступленне будзе праводзіцца па методыках НАТА з агнявой падтрымкай з паветра і агнявым паражэннем з дапамогаю ракетных войскаў.
Плануецца, што Украіна атрымае ад 50 да 80 самалётаў. Асноўная іх маса павінна паступіць у канцы студзеня — лютым. З імі разам, мяркуе Жданаў, будуць пастаўлены ракеты і іншыя боепрыпасы. Такім чынам, адбудзецца кратнае ўзмацненне баявой магутнасці.
«І ўжо не важна, колькі будзе ліній Суравікіна. А аперацыі будуць праводзіцца на адным, максімум на двух аператыўных напрамках. Але яны будуць уплываць на агульную карціну лініі фронту», — прагназуе Жданаў.
Пытаннем застаецца, якім чынам будзе праведзена мабілізацыя 450-500 тысяч чалавек. На погляд Жданава, гэта патрэба Узброеных сіл Украіны на 2024 год і «для пакрыцця двух трацін будзе дастаткова перагляду штату дзяржслужачых і сілавых структур».
Суадносіны сіл на фронце
Шайгу 19 снежня заявіў пра планы павелічэння колькасці расійскіх войскаў у 2024 годзе да 1,5 мільёна. Цяпер колькасць складае 1 мільён 150 тысяч.
Але з гэтай колькасці, як адзначае Жданаў, на ўкраінскім фронце ваюе каля 430 тысяч чалавек. З іх на пярэднім краі — каля 250-300 тысяч.
Калі гаварыць пра ўкраінскі бок, то «пад ружжом» знаходзіцца 1 мільён 100 тысяч чалавек. Гэтую лічбу ў адным з інтэрвʼю называў Давід Арахамія. З іх 500 тысяч на фронце і 250 тысяч «на нулі». Такім чынам, адзначае вайсковы аналітык, на лініі фронту па колькасці войскаў назіраецца парытэт.
Нельга забывацца і пра падрыхтоўку ўкраінскіх вайскоўцаў у вучэбных цэнтрах за мяжою. Таксама падобныя цэнтры адкрываюцца на тэрыторыі Украіны. Інструктарамі ў іх зʼяўляюцца вайскоўцы, што прайшлі навучанне на Захадзе.
Акрамя гэтага Украіна атрымлівае больш сучасную тэхніку. Гэта артылерыйскія сістэмы, танкі. Рыхтуюцца пастаўкі авіяцыі і ракет далёкасцю 300 кіламетраў. Ідуць пастаўкі сістэм СПА. «Пяць самалётаў за тыдзень проста так нельга збіць. Значыць, нешта далі суперсучаснае, што расіяне не могуць нават усвядоміць», — распавядае аналітык.
Чытайце яшчэ:
Ці стане вайна ва Украіне пазіцыйнай? Тлумачыць эксперт
Навошта ўтрымліваць украінскі плацдарм на левым беразе Дняпра? Тлумачыць эксперт
Былы афіцэр, выжыў у страшным баі. Хто той каліновец Верамейчык, якога В’етнам аддаў беларускаму КДБ?36
Каментары