Літоўская мытня чарговы раз ускладніла ўмовы для транзіту аўто з ЗША ў Беларусь. Якія аўто цяпер могуць захраснуць у порце Клайпеды?

Новыя неагучаныя абмежаванні?

З сярэдзіны чэрвеня праз Літву ў Беларусь можна было вывозіць аўтамабілі са Штатаў ва ўзросце да 5 гадоў толькі з аб’ёмам рухавіка да 1,9 літра. Электрамабілі і гібрыды маладзейшыя за 5 гадоў не выпускалі ў Беларусь, патрабуючы даведку ад вытворцы, якую дэ-факта атрымаць немагчыма.

Калі з моманту выпуску аўтамабіля прайшло больш за 5 гадоў, літоўская мытня афармляла таксама аўто з аб’ёмам рухавіка, большым за 1,9 літра, гібрыды і электрамабілі. 

Аднак з цягам часу патрабаванні літоўскай мытні зноў сталі больш строгімі.

Цяпер адзіная катэгорыя аўто з ЗША, якія ў Клайпедзе афармляюць без праблем і дадатковых патрабаванняў, — гэта машыны з аб’ёмам рухавіка да 1,5 літра. 

Для афармлення транзітнай дэкларацыі на аўто з аб’ёмам ад 1501 см³ да 1900 см³ пачалі патрабаваць даведку ад еўрапейскага дылера з указаннем клірэнсу.

Без яе транзіт у Беларусь больш не афармляюць. Калі ў даведцы будзе пазначана, што вышыня клірэнсу, прадугледжаная вытворцам, перавышае 16,5 см, то такі аўтамабіль у Беларусь не трапіць.

Уласнае меркаванне можа быць важнейшае за даведку

Пры гэтым дэкларанты папярэджваюць, што нават наяўнасць даведкі, у якой пазначана, што клірэнс дазваляе аформіць транзіт, не гарантуе станоўчага рашэння, бо літоўская мытня ўсё роўна можа адмовіць у выпісцы транзітнай дэкларацыі на сваё меркаванне.

Аўтамабілі старэйшыя за 5 гадоў з аб’ёмам рухавіка, большым за 1,9 літра, электрамабілі і гібрыды, якія яшчэ ў пачатку восені без праблем афармлялі на Беларусь, апошнім часам таксама атрымліваюць адмову ў афармленні транзіту.

Акрамя таго, некаторыя адзначаюць, што схема з афармленнем і вывазам такіх аўто праз Польшчу таксама больш не працуе.

Павялічыць

Пакупнікам падсанкцыйных аўто варта рыхтавацца да вялікіх выдаткаў

Кампаніі, якія аказваюць пасярэдніцкія паслугі па куплі аўто з ЗША, ужо пачалі прапаноўваць сваім кліентам, якія набылі машыны старэйшыя за 5 гадоў, перанакіроўваць іх на Грузію, бо шанец даставіць такія аўто праз Літву мізэрны. 

Тым не менш, пэўная колькасць такіх машын усё адно накіроўваецца ў порт Клайпеда, дзе з вялікай верагоднасцю яны захраснуць, як гэта ўжо было на пачатку лета. 

Машыны, на якія з тых ці іншых прычын літоўская мытня не афармляе транзітныя дэкларацыі на Беларусь, пакупнікам давядзецца вывозіць альтэрнатыўнымі шляхамі. А гэта дадатковыя 4,5—6 тысяч еўра на лагістыку. 

Павялічыць

Частка беларускіх кампаній пасля падзей пачатку лета цалкам адмовілася ад працы з портам Клайпеда, абгрунтаваўшы такое рашэнне тым, што літоўскі порт больш не выглядае надзейным партнёрам. 

Грузія зноў у выйгрышы?

Такія перавозчыкі перанакіравалі ўвесь трафік на Германію, Нідэрланды і Грузію. Выглядае, што менавіта Грузія цяпер застаецца найбольш прадказальным кірункам, хоць дастаўка праз гэтую краіну абыходзіцца на 1500—2000 даляраў даражэй, чым праз Літву.

Адметна, што Грузія забараніла рээкспарт падсанкцыйных аўто з ЗША ў Расію і Беларусь яшчэ летам 2023 года. Але забарона носіць хутчэй фармальны характар. Натуральна, што грузінская мытня не афармляе дакументы на пакупнікоў з РБ і РФ. Гэта робіцца праз падстаўных грамадзян і кампаніі з трэціх краін, такіх як Азербайджан, Казахстан ці Кыргызстан. 

Выглядае, што з падобнай з’явай там не змагаюцца і змагацца не збіраюцца, бо закрыццё вачэй на выкананне ўведзеных самой Грузіяй абмежаванняў дазваляе краіне і бізнэсу атрымліваць з гэтага добрыя дывідэнды.

• 9
• 3
• 5
• 2
• 1
• 1
• 1
• 0