Вызваленая ўчора з расейскага палону медык брыгады марпехаў заручылася з пабрацімам
Галіна Федзішын, баявы медык брыгады марпехаў, якую вызвалілі з расейскага палону падчас абмену 3 студзеня, заручылася з каханым — пабрацімам Міколам Грыцэняком. Пра гэта паведаміў у сацсетках Сяргей Валынскі («Валына»), камандзір 36-й асобнай брыгады марской пяхоты.
Як піша «Валына», пара разам прайшла баі за Марыупаль, вытрымала выпрабаванне палонам і доўгае расстанне.
«Гэтае каханне перажыло выпрабаванні, здольныя зламаць наймацнейшых. Пара ўкраінскіх марпехаў паказала, што сапраўдныя пачуцці не ведаюць перашкод, нават калі гэта «пекла на зямлі», — напісаў «Валына».
Ён дадаў, што Галіна — апошняя дзяўчына-марпех, якая заставалася ў варожым палоне.
Кантракт з узброенымі сіламі Украіны Галіна падпісала яшчэ ў 2016 годзе. Датуль яна год прапрацавала медыцынскай сястрой у грамадзянскай бальніцы.
У кастрычніку 2016 года ў складзе медычна-сястрынскай брыгады Вінніцкага мабільнага шпіталя Галіна адправілася на Луганшчыну. Там яна ўдзельнічала ў эвакуацыі параненых байцоў.
Пасля далучылася да шэрагаў асобнай брыгады марской пяхоты, дзе на пасадзе баявога медыка працягвала ратаваць жыцці ўкраінскіх вайскоўцаў.
У акопах на лініі размежавання ў Данецкай вобласці дзяўчына сустрэла сваё каханне — марпеха Міколу Грыцэняка. Вайна заспела пару ў Данецкай вобласці.
Пад націскам расіян іх падраздзяленне адышло з пазіцый паблізу Марыупаля на тэрыторыю «Азоўсталі». Падчас жорсткіх баёў дзяўчына была параненая.
У маі 2022 года яна разам з Міколам і іншымі пабрацімамі выйшла ў палон. За расійскімі кратамі ў пары не было магчымасці бачыцца. Мікола вярнуўся з палону некалькі месяцаў таму.
«У людзей у Беларусі няма зброі? Дапаможам». Камандзір палка Каліноўскага расказаў пра сілавы сцэнар, прэтэнзіі і стомленасць
«Мае ныркі не перажылі Бахмута. Але вызваляць Беларусь я гатовы нават без нырак»
«Мне прасцей, што я ніколі не верыла ў цуд». Беларуска з палка Каліноўскага расказала пра франтавыя будні, каханне на вайне і сапраўдную радасць
Што чакае Беларусь у бліжэйшыя пяць гадоў? А Расію і Еўропу? Спецдакладчык ААН па Беларусі дае свой расклад7
Каментары