Ізраіль абвясціў дату штурму Рафаха, калі ХАМАС не вызваліць закладнікаў
Там знайшлі прытулак каля 1,5 млн палесцінцаў. Гэта будзе пачатак Рамадана.
Міністр ізраільскага ваеннага кабінета Бені Ганц папярэдзіў, што калі ХАМАС не вызваліць усіх закладнікаў, якія ўтрымліваюцца ў Газе, Ізраіль 10 сакавіка пачне штурм Рафаха на поўдні сектара, піша Бі-бі-сі.
Раней агенцтва ААН па ахове здароўя паведаміла, што адна з ключавых бальніц Газы перастала функцыянаваць пасля ізраільскага рэйду.
Сусветная арганізацыя аховы здароўя (СААЗ) заявіла, што ёй не дазволілі ўвайсці ў бальніцу «Насер» у Хан-Юніс, размешчаным на поўнач ад Рафаха, каб ацаніць сітуацыю.
Армія абароны Ізраіля (ЦАХАЛ) увайшла ў бальнічны комплекс у чацвер, заявіўшы, што, паводле звестак разведкі, там утрымліваюцца закладнікі, захопленыя ХАМАС.
ЦАХАЛ назваў сваю аперацыю ў Хан-Юніс «дакладнай і абмежаванай», абвінаваціўшы ХАМАС у «цынічным выкарыстанні бальніц для тэрору».
Выступаючы ў нядзелю, былы міністр абароны Ізраіля Бені Ганц сказаў: «Свет павінен ведаць, і лідары ХАМАС павінны ведаць — калі да Рамадана нашы закладнікі не вернуцца дадому, баявыя дзеянні будуць працягвацца паўсюль, у тым ліку і ў раёне Рафаха».
Рамадан — святы для ісламу месяц посту — у гэтым годзе пачынаецца 10 сакавіка.
Ганц дадаў, што Ізраіль будзе дзейнічаць «скаардынавана, садзейнічаючы эвакуацыі цывільных асоб у дыялогу з нашымі амерыканскімі і егіпецкімі партнёрамі, каб звесці да мінімуму ахвяры сярод мірнага насельніцтва».
7 кастрычніка мінулага года баевікі, узначаленыя ХАМАС, атакавалі Ізраіль, забіўшы не менш за 1200 чалавек і захапіўшы 253 закладнікі. Каля 130 закладнікаў усё яшчэ ўтрымліваюцца баевікамі ў Газе.
Па словах дыпламатычнага карэспандэнта Бі-бі-сі Пола Адамса, Ізраіль, імаверна, чакае, што некаторыя палесцінцы пакінуць сектар Газа і будуць шукаць прытулку на егіпецкім баку мяжы, дзе ўлады, здаецца, будуюць для гэтых мэтаў вялікі комплекс.
Але ізраільскія ўлады пакуль не паведамілі ніякіх падрабязнасцяў аб плане эвакуацыі, дадае ён.
Да пачатку Рамадана застаецца роўна тры тыдні, і, па паведамленнях з Рафаха, некаторыя людзі пакідаюць горад, накіроўваючыся на захад да ўзбярэжжа, але большасць усё яшчэ чакаюць, не ведаючы, што рабіць.
Нягледзячы на міжнародны ціск, прэм'ер-міністр Ізраіля Біньямін Нетаньяху пакляўся пачаць наземную атаку на Рафах, каб знішчыць там баевікоў ХАМАС.
Егіпет і некаторыя іншыя арабскія краіны неаднаразова папярэджвалі, што ізраільскі наступ на Рафах можа прывесці да таго, што многія палесцінцы будуць вымушаныя бегчы ў Егіпет. Каір лічыць гэта непрымальным.
Саудаўская Аравія паабяцала «вельмі сур'ёзныя наступствы» ў выпадку штурму Рафаха.
На міжнародным узроўні прагучала мноства заклікаў да Ізраіля ўстрымацца ад штурму Рафаха.
Па сцвярджэнні падкантрольнага ХАМАС Міністэрства аховы здароўя ў Газе, з пачатку вайны загінулі больш за 28 400 палесцінцаў і больш за 68 000 атрымалі раненні.
Па даных гэтага ведамства, прынамсі 127 палесцінцаў былі забітыя і 205 атрымалі раненні за апошнія 24 гадзіны.
Нягледзячы на баі ў Газе, у апошнія дні ў Каіры робяцца намаганні па заключэнні пагаднення аб спыненні агню паміж Ізраілем і ХАМАС, хоць катарскія пасярэднікі заявілі, што прагрэс «не вельмі шматспадзеўны».
Нетаньяху сказаў, што па просьбе прэзідэнта ЗША Джо Байдэна адправіў у Каір ізраільскіх перамоўшчыкаў, але дадаў, што яны не вярнуліся для далейшых абмеркаванняў, бо патрабаванні ХАМАС былі «вар'яцкімі».
ХАМАС абвінавачвае Ізраіль у адсутнасці прагрэсу ў дасягненні пагаднення аб спыненні агню.
Каментары