«Гомельская праўда» ачуняла ад атакі «Кіберпартызанаў» толькі праз 8 дзён
Як паведамляе «Флагшток», сёння прапагандысцкі рэсурс «Гомельская праўда» нарэшце стаў зноў адчыняцца ў Беларусі пасля атакі на яго, праведзенай «Кіберпартызанамі» 25 сакавіка. Пры гэтым за межамі краіны рэсурс па-ранейшаму недасяжны.
Прадстаўнік «Кіберпартызанаў» пракаментаваў «Флагштоку» дзеянні групоўкі:
«Выбралі іх, таму што была ідэя размясціць на розных пралукашэнкаўскіх парталах віншаванне з Днём Волі і аб'яву пра актыўны набор у Полк Каліноўскага праз новы бот, які мы стварылі. Цяпер Беларусі вельмі патрэбныя сапраўдныя героі і абаронцы свайго народу, таму мы вырашылі прыцягнуць увагу менавіта да гэтай тэмы.
Пляцоўка для навінаў нам падалася найбольш арганічным рэсурсам для рэалізацыі нашай ідэі. А «Гомельская праўда» якраз з'яўляецца такой пралукашэнкаўскай пляцоўкай. То-бок мы адначасова і віншавалі крэатыўна беларусаў з Днём Волі, і атакавалі варожы рэсурс, і прыцягвалі ўвагу да набору ў ПКК.
Зрабіць было не складана. Мы зрабілі ў той дзень шэраг яшчэ падобных атак».
Прадстаўнікі «Гомельскай праўды» і чыноўнікі сітуацыю з блакаваннем рэсурсу не каментавалі.
Каментары