«Бегаў па калідоры, размахваў рукамі». З Беларусі паказальна выслалі студэнта з ДР Конга
На яго склалі некалькі пратаколаў і адпраўлялі на суткі.
Студэнта з Дэмакратычнай Рэспублікі Конга прымусова выслалі з Беларусі. Пасяджэнне па высылцы праводзілі ў прысутнасці студэнтаў універсітэта.
Хлопец 1995 года нараджэння вучыўся на падрыхтоўчых курсах у Гродне. Здаўшы экзамены, ён атрымаў бы магчымасць паступіць у адну з беларускіх ВНУ. Аднак да выпрабаванняў ён не дабраўся.
Як паведамляе гродзенская міліцыя, сярэдні бал студэнта складаў 3,6. Акрамя таго, кангалезец пастаянна канфліктаваў з супрацоўнікамі ўніверсітэта і іншымі студэнтамі. Паведамляецца, што ў дзень, калі ён быў дастаўлены ў дзяжурную частку райаддзела, хлопец «бегаў па калідоры інтэрната, паводзіў сябе агрэсіўна, размахваў рукамі, за што быў прыцягнуты да адміністрацыйнай адказнасці». Студэнту прызначылі штраф 400 рублёў, які ён не аплаціў.
Праз некаторы час ён зноў атрымаў пратакол за дробнае хуліганства і непадпарадкаванне патрабаванням супрацоўнікаў міліцыі — кангалезец не змог паказаць пашпарт, таму што страціў яго. У пратаколе пазначана, што малады чалавек «адмаўляўся прайсці ў службовы аўтамабіль, крычаў, размахваў рукамі, на заўвагі не рэагаваў» — за гэта ён атрымаў 7 сутак арышту.
У міліцыі сцвярджаюць, што на пасяджэнні ў пытанні дэпартацыі хлопец таксама паводзіў сябе абуральна.
Адмоўна ахарактарызавалі яго і ва ўніверсітэце «невыканальны, недысцыплінаваны, да заняткаў не рыхтуецца і сістэматычна прапускае іх без уважлівай прычыны. Нецярплівы, неўраўнаважаны, запальчывы, агрэсіўны. Пастаянна канфліктуе з работнікамі ўніверсітэта, парушае правілы пражывання ў інтэрнаце. У размове паводзіць сябе нахабна, грубіяніць».
У выніку кангалезца дэпартавалі з Беларусі з забаронай на ўезд на 10 гадоў.
Цяпер чытаюць
Лукашэнка нервова пракаментаваў візіт Ціханоўскай у Кіеў24
Каментары