У Дэмакратычнай Рэспубліцы Конга заявілі пра спробу дзяржаўнага перавароту
Раніцай 19 мая ў сталіцы краіны Кіншасе дзве групы ўзброеных людзей паспрабавалі напасці на прэзідэнцкі палац. Потым асноўнага апазіцыянера забілі.
Улады афрыканскай дзяржавы Дэмакратычная Рэспубліка Конга (былы Заір) заявілі аб падаўленні спробы ваеннага перавароту. Улады сцвярджаюць, што меркаваны арганізатар перавароту быў забіты, каля 50 чалавек арыштаваныя. Сярод арыштаваных трое грамадзян Злучаных Штатаў, піша Радыё Свабода са спасылкай на прадстаўніка арміі Конга.
Раніцай 19 мая ў сталіцы краіны Кіншасе дзве групы ўзброеных людзей паспрабавалі напасці на прэзідэнцкі палац, а таксама на дом дэпутата і кандыдата на пасаду спікера парламента. Сцвярджаецца, што ў перастрэлцы загінулі двое ахоўнікаў, ёсць загінулыя таксама з боку тых, хто нападаў.
Пасля ўлады паведамілі пра забойства меркаванага кіраўніка спробы перавароту, апазіцыйнага палітыка Крысціяна Малангі, які некаторы час жыў у ЗША.
Сцвярджаецца, што ён быў забіты падчас спробы захопу прэзідэнцкага палаца. Якіх-небудзь падрабязнасцяў не прыводзіцца.
Раней у фэйсбуку Малангі з'явілася відэа, у якім ён кажа пра намер зрынуць улады. Паводле непацверджаных паведамленняў, адзін з затрыманых амерыканскіх грамадзян — сын забітага апазіцыянера.
Пасол ЗША ў Конга Люсі Тамлін заявіла, што ў амбасадзе вельмі занепакоеныя паведамленнямі ўладаў аб магчымым удзеле амерыканскіх грамадзян у спробе перавароту, і паабяцала аказаць уладам Рэспублікі поўнае садзейнічанне ў расследаванні, як гаворыцца ў паведамленні, «злачынных дзеянняў» мяцежнікаў.
Маланга быў адным з найбольш вядомых кангалезскіх апазіцыянераў, якія жылі за мяжой. Паведамляецца, што раней ім быў створаны так званы ўрад новага Заіра ў выгнанні. Пры Прэзідэнце Мабуту Сесе Сека, зрынутым у 1997 годзе, цяперашняя Дэмакратычная Рэспубліка Конга афіцыйна называлася Заірам.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі10
Каментары