Паўнамаштабная вайна паміж Ізраілем і «Хезбалой» можа пачацца ў бліжэйшы час
Шэраг краін, у тым ліку ЗША і Расія, заклікалі сваіх грамадзян пакінуць альбо не прыязджаць у Ліван, які фактычна знаходзіцца пад кантролем «Хезбалы». Што гэта за групоўка і чаму яна мацнейшая за ХАМАС?
Амерыканская выведка канстатуе вельмі высокую рызыку ізраільскага ўварвання ў Ліван з мэтай поўнамаштабнага супрацьстаяння «Хезбале», паведамляе выданне Politico.
Высокапастаўленыя крыніцы выдання ва ўрадзе ЗША прагназуюць, што новая вайна можа пачацца ўжо «ў бліжэйшыя тыдні».
Ізраіль і «Хезбала» падрыхтавалі баявыя планы і знаходзяцца ў стадыі закупак дадатковага ўзбраення. Абодва бакі, нягледзячы на намаганні адміністрацыі Байдэна па дээскалацыі, хутчэй за ўсё пачнуць вайну, якая можа пацягнуць за сабой гуманітарную катастрофу і прамы ўдзел ЗША.
Прычым некаторыя еўрапейскія разведкі чакаюць пачатку вайны ўжо ў найбліжэйшыя дні», — піша Politico са спасылкай на двух амерыканскіх чыноўнікаў.
Крыніцы адзначаюць, што прадухіліць амаль непазбежную вайну можа толькі пагадненне паміж Ізраілем і тэрарыстычнай групоўкай ХАМАС аб спыненні агню ў сектары Газа і поўнае вызваленне ізраільскіх закладнікаў. Аднак перамовы на дадзеным этапе ідуць складана і наўрад ці будуць паспяховымі.
«Мы прыкладаем намаганні для канчатковага заключэння ўгоды, якая ўсталюе доўгатэрміновы мір у Газе і прадухіліць новую вайну супраць «Хезбалы». Але зараз усё залежыць ад пазіцыі і згоды ХАМАСа», — заяўляюць чыноўнікі.
«Хезбала» (ад араб. «Партыя Алаха») з'яўляецца ліванскай радыкальнай ваенізаванай ісламісцкай групоўкай і адначасова палітычнай партыяй з месцамі ва ўрадзе і ў парламенце Лівана. У многіх краінах свету «Хезбала» прызнана тэрарыстычнай арганізацыяй (Беларусь не прызнае яе такой, а Расія, Кітай і Іран увогуле называюць групоўку паўнапраўнай палітычнай сілай). Колькасць членаў і прыхільнікаў «Хезбалы» складае дзясяткі тысяч чалавек не толькі ў Ліване, але і ва ўсім свеце.
Групоўка ўзнікла ў агні ліванскай грамадзянскай вайны 70-90-ых гадоў мінулага стагоддзя ў якасці адказу на першае ўварванне Ізраіля ў Ліван і з тых часоў афіцыйна мае мэту татальнага знішчэння яўрэйскай дзяржавы.
Усяго Ізраіль урываўся на тэрыторыю Лівана двойчы. Першы раз — у 1982 годзе, калі Ізраіль ваяваў супраць Арганізацыі вызвалення Палесціны і падчас кампаніі захапіў ліванскую сталіцу Бейрут разам з поўднем краіны. Ізраільская армія канчаткова сышла з Лівана толькі ў 2000 годдзе, а затым праз 7 гадоў паўтарыла ўварванне ўжо супраць «Хезбалы», якое скончылася дзякуючы ўмяшальніцтву ААН.
Ліванская «Хезбала», у адрозненне ад палесцінскай ХАМАС, уяўляе сабой паўнавартасную армію з рознымі родамі войскаў. «Хезбала» мае добра абсталяваную пяхоту, танкі, БМП, РСЗА, сістэмы СПА, беспілотнікі і нават балістычныя ракеты.
Колькасць баевікоў у «Хезбалы» складае ад 45 да 100 тысяч чалавек, што як мінімум у 3-4 разы перавышае паказчыкі ХАМАС.
Групоўка ў плане фінансаў, рэсурсаў і вайсковай падрыхтоўкі амаль цалкам залежыць ад Ірана, якому дала афіцыйную клятву вернасці (што таксама адрознівае яе ад ХАМАС, які вядзе больш самастойны лад жыцця).
Моцная сувязь паміж Іранам і «Хезбалой» падмацоўваецца яшчэ і тым фактам, што паміж імі практычна няма ніякіх геаграфічных і палітычных перашкод. Іран можа спакойна і ў любой колькасці пастаўляць рэсурсы «Хезбале» напрамую праз сяброўскія Ірак і Сірыю, дзе існуе вялікая колькасць праіранскіх ваенізаваных груповак.
ХАМАС у сваю чаргу геаграфічна ізаляваны Ізраілем у Газе і не можа разлічваць на хоць неяк значную падтрымку саюзнікаў.
Цяпер чытаюць
Бабарыка, Золатава і яшчэ некалькі дзясяткаў былых палітвязняў заклікалі еўрапейскіх лідараў актыўней дамаўляцца наконт вызваленняў49
Каментары