50-гадовы мужчына правеў у псіхіятрычнай бальніцы 25 год без пашпарта і ведання таго, хто ён. Яму дапамаглі судмедэксперты.
Судовыя эксперты Дзяржаўнага камітэта судовых экспертыз па Магілёўскай вобласці дапамаглі вызначыць асобу пацыента бальніцы, які не меў пашпарта грамадзяніна Беларусі.
Больш за дваццаць гадоў таму ў псіхіятрычную бальніцу паступіў малады мужчына без ніякіх дакументаў, які назваў даволі бедныя звесткі пра сябе: прозвішча, імя і год нараджэння. Як пасля выявілася — недакладныя. Іншыя звесткі, у тым ліку месца жыхарства, у сілу свайго псіхічнага здароўя пацыент паведаміць не мог. Пошук сваякоў поспехам не ўвянчаліся.
У 2024 годзе даныя генатыпу пацыента змясцілі ў банк даных ДНК Дзяржаўнага камітэта судовых экспертыз.
Пры праверцы па базе высветлілася, што яго генетычныя характарыстыкі адпавядаюць генетычным характарыстыкам жыхара Віцебскай вобласці 1945 года нараджэння. Пацыент бальніцы і названы грамадзянін маглі зʼяўляцца сваякамі першага парадку — бацькам і сынам.
Пацвердзіць або выключыць сваяцтва мужчын магла б генетычная экспертыза, аднак жыхар Віцебскай вобласці памёр 9 гадоў таму, у той час як у яго засталіся дзеці. Адзін яго сын, які пакутаваў на псіхічнае захворванне, знік без вестак у 1998 годзе. У рамках вышуковай справы ў бацькі зніклага 15 гадоў таму адабралі біялагічныя ўзоры і змясцілі генетычныя характарыстыкі ў базу даных ДНК. Яго генетычныя характарыстыкі і супалі ў базе з генатыпам пацыента магілёўскай бальніцы.
Для правядзення судовай генетычнай экспертызы адабраны біялагічныя ўзоры ў 40-гадовага сына памерлага бацькі.
Па выніках экспертызы вызначана, што пацыент псіхіятрычнага шпіталя і 40-гадовы жыхар Віцебскай вобласці з высокай ступенню верагоднасці зʼяўляюцца біялагічнымі сваякамі і могуць быць роднымі братамі.
Такім чынам, вынікі экспертызы дапамаглі не толькі ўстанавіць асобу пацыента бальніцы — ім аказаўся ўраджэнец Віцебскай вобласці, 1973 года нараджэння, але адыгралі вельмі важную ролю ў далейшым жыцці мужчыны.
Праз 25 гадоў чалавек зноў здабыў сямʼю — сваякі забралі яго з лякарні дадому.
Цяпер чытаюць
Бабарыка, Золатава і яшчэ некалькі дзясяткаў былых палітвязняў заклікалі еўрапейскіх лідараў актыўней дамаўляцца наконт вызваленняў45
Каментары