У Германіі самалёту давялося сесці ў іншым горадзе праз забарону на начныя палёты. Ён спазніўся ўсяго на 10 секунд
Інцыдэнт адбыўся ў суботу ўвечары. Самалёт кампаніі Eurowings вылецеў з Алікантэ ў сталіцу Германіі з затрымкай прыкладна на гадзіну, піша Bild.
Паветранае судна ўжо пайшло на пасадку ў Берліне, аднак рэзка зноў паднялося ў неба і прызямлілася ўжо ў Гановеры, які знаходзіцца на адлегласці амаль трохсот кіламетраў ад сталіцы.
212 пасажырам гэтага рэйса давялося дабірацца да Берліна самастойна.
Рэч у тым, што ў Берліне дзейнічае забарона на начныя палёты — яна ўступае ў сілу з 23:30. Аднак для рэйсаў, якія затрымоўваюцца, існуе выключэнне, якое дазваляе ім прызямляцца да 00:00.
Служба кіравання паветраным транспартам ужо расчысціла ўзлётна-пасадачную паласу для самалёта з Алікантэ, аднак таму не хапіла лічаных секунд, каб здзейсніць пасадку.
«Нягледзячы на затрымку ў той дзень, экіпаж рэйса прыклаў усе намаганні, каб даставіць пасажыраў у аэрапорт прызначэння ў Берлін», — паведаміў прадстаўнік Eurowings.
У авіякампаніі дадалі, што збіраюцца пакрыць выдаткі, якія панеслі пасажыры, дабіраючыся з Гановера ў Берлін.
Каментары