Падчас заняткаў у віцебскай спартшколе моцна пацярпеў хлопчык-футбаліст
Пра тое, што падчас заняткаў у віцебскай спецыялізаванай дзіцяча-юнацкай школе алімпійскага рэзерву «Камсамолец» пацярпеў школьнік, паведаміла Міністэрства аховы здароўя.
Ніякіх падрабязнасцяў інцыдэнту прэс-служба ведамства не прыводзіць, але вынікае, што сітуацыя вельмі сур'ёзная, бо ў Віцебску з гэтай нагоды склікалі рэспубліканскі кансіліум з удзелам вядучых нейрахурургаў, спецыялістаў кафедраў неўралогіі і нейрахірургіі, анестэзіялогіі і рэанімацыі. На кансіліуме разглядаецца пытанне аб прымяненні розных сучасных методык лячэння хлопчыка.
Паведамляецца, што дзіця экстранна шпіталізавана брыгадай хуткай медыцынскай дапамогі ў Віцебскую абласную клінічную бальніцу.
Хлопчык знаходзіцца ў аддзяленні рэанімацыі, ягоны стан цяжкі. Яму праводзіцца медыкаментознае лячэнне з нагоды цяжкай чэрапна-мазгавой траўмы, удару галаўнога мозгу, пералому асновы чэрапа, удару грудной клеткі.
З Мінска на дапамогу мясцовым дактарам выкліканыя дзіцячы рэаніматолаг Інстытута павышэння кваліфікацыі і перападрыхтоўкі кадраў аховы здароўя БДМУ Уладзімір Волкаў і дзіцячы нейрахірург з РНПЦ неўралогіі і нейрахірургіі Кевін Фернанда Венегас.
У сваю чаргу, Мінспорту паведамляе:
«Абставіны траўмавання спартсмена-навучэнца аддзялення футбола вучэбна-спартыўнай установы «Спецыялізаваная дзіцяча-юнацкая школа алімпійскага рэзерву «Камсамолец» г.Віцебска» падчас заняткаў у паветраапорным манежы… высвятляюцца».
Каментары