Лябедзька прапануе ўвесці мараторый на сваркі ў апазіцыі напярэдадні выбараў
«Перад пачаткам выбарчай кампаніі дзве групы расчахляюць зброю і распачынаюць паміж сабою вайну ў інфармацыйнай прасторы. У якую рэжым толькі падкідвае порах».
Палітык Анатоль Лябедзька прапанаваў дэмакратычным сілам увесці мараторый на публічныя сваркі перад выбарамі-2025.
Сярод прыхільнікаў перамен ёсць дзве групы з рознай пазіцыяй наконт наступных выбараў, кажа Лябедзька. Адна аб'ядноўвае тых, хто выступае катэгарычна супраць удзелу ў галасаванні.
«Для іх гэта як у белых чаравіках ісці па дрыгве — запэцкаешся. Гэта іх прынцыповая пазіцыя і наўрад ці большасць яе зменяць, калі прапанаваць нешта іншае», — лічыць палітык.
Да другой групы прыхільнікаў перамен ён адносіць тых, хто лічыць, што недастаткова проста канстатаваць, што ў Беларусі няма выбараў, і пры гэтым сядзець на канапе.
Таксама Лябедзька выдзяляе прамежкавую групу — людзей, якія, можа, і хацелі б не пайсці, але яны прывязаны да месца працы, вучобы, інтэрнатаў. Імі лёгка маніпуліраваць, на іх эфектыўна працуе адміністрацыйны рэсурс.
«Па ўжо ўкаранелай традыцыі перад пачаткам выбарчай кампаніі дзве групы расчахляюць зброю і распачынаюць паміж сабою вайну ў інфармацыйнай прасторы. У якую рэжым толькі падкідвае порах. Вайну бессэнсоўную і безвыніковую», — гаворыць палітык.
Але разам з тым, заўважае Лябедзька, усе групы выступаюць за свабодныя, сумленныя выбары.
«Гэта тыя людзі, што ў 2020 годзе выходзілі на вуліцу. І, як мне падаецца, менавіта пытанне свабодных, сумленных выбараў трэба актуалізаваць і паставіць на першае месца. І па гэтым кейсе працаваць і з нашымі прыхільнікамі перамен, і з тымі, хто яшчэ сумняваецца», — лічыць палітык і прапануе:
«Неабходна дамовіцца ўсім палітыкам, якія выступаюць спікерамі розных груп, — мы не вядзём канфрантацыю адно з адным.
Таму што, калі патрацім частку гэтага часу на тое, каб гаварыць, што няправільную пазіцыю займаюць тыя ці іншыя, то згубім працу з астатнім грамадствам, з тымі, хто хістаецца, і не зможам патлумачыць, што свабодныя сумленныя выбары — не толькі права выбіраць, але і эканоміка, дабрабыт, заробкі і ўсё астатняе».
«Вельмі важна зараз дабіцца, каб быў мараторый на крытыку і, магчыма, прапанаваць варыянт меню. Не адну опцыю, што можна рабіць падчас гэтай «спецаперацыі», а некалькі.
Не хочаш — не хадзі на выбарчы ўчастак, прыйшоў — прагаласуй супраць усіх».
Такая пазіцыя, на погляд Лябедзькі, самае рацыянальнае, што дэмакратычныя сілы могуць зрабіць у існуючай сітуацыі.
Лябедзька: Беларуская мова павінна стаць адзінай дзяржаўнай. Але трэба закласці пераходны перыяд
Лябедзька расказаў, пры якіх трох умовах знікне легітымнасць Святланы Ціханоўскай
Лябедзька — пра Шэймана, Качанаву, ворагаў па апазіцыі і тое, хто возьме ўладу Лукашэнкі
Якімі будуць выбары 2025 года? Разважаюць Вячорка, Латушка і Шрайбман
«Проста заліваешся слязьмі і думаеш: за што?» Ірына Шчасная і яе чатыры балючыя гады за кратамі7
Каментары
Дзе рэакцыя Лябедзькі?