У горад Умань, што знаходзіцца ў Чаркаскай вобласці, на святкаванне Рош га-Шана, яўрэйскага Новага года, ужо прыехалі больш за 35 тысяч хасідаў-паломнікаў, паведамляе «Украінская праўда». Яны традыцыйна штогод прыязджаюць з розных краін свету, каб ушанаваць памяць рабі Нахмана, заснавальніка брацлаўскага хасідызму, чыя магіла знаходзіцца ў гэтым украінскім горадзе.
Пра наяўную цяпер сітуацыю паведаміў прадстаўнік Дзяржаўнай памежнай службы Украіны палкоўнік Андрэй Дземчанка. Паводле яго слоў, асноўны прыток паломнікаў адбыўся за апошнія пяць дзён, хоць прыбываць яны пачалі яшчэ некалькі тыдняў таму.
Хасіды актыўна перасякаюць мяжу Украіны не толькі з краінамі ЕС, але і праз Малдову. Большасць з іх рухаецца арганізаванымі групамі.
Сёлета былі выпадкі адмовы ва ўездзе з-за праблем з дакументамі або таму, што некаторым асобам ужо раней забаранілі ўезд за парушэнні ўкраінскага заканадаўства.
Ужо ў самім горадзе паломнікі ўзялі ўдзел у масавай малітве Цікун а-Клалі, якая з’яўляецца важнай часткай святкавання. На яе сабраліся каля 10 тысяч чалавек.
Свята Рош га-Шана ў 2025 годзе доўжыцца з 22 па 24 верасня. Гэта свята, якое сімвалізуе пачатак новага года па іўдзейскім календары. Для хасідаў гэты час духоўнага абнаўлення.
Раней Міністэрства замежных спраў Украіны заклікала замежных паломнікаў улічваць, што ў краіне працягваецца поўнамаштабная вайна, таму дзяржава не можа гарантаваць ім поўнай бяспекі падчас знаходжання. Але хасіды ў сваіх паломніцтвах звычайна не зважаюць на цяжкасці — у 2020 годзе, падчас дзеяння каранавірусных абмежаванняў, яны прарываліся на тэрыторыю Украіны праз беларускую мяжу.
Цяпер чытаюць
Закінутую сядзібу Багдановічаў пераробяць у буціковы гатэль ФОТЫ7
Каментары
То бок, яны ведаюць, што вайна і праз каго.