Археолагі знайшлі фрагмент тунікі, якая належала Аляксандру Македонскаму
Тканіна была знойдзена ў каралеўскай грабніцы ўзростам каля 2400 гадоў, разам з парэшткамі мужчыны, пахаванага ў залатым вянку.
Фрагмент баваўнянай тканіны, афарбаванай у пурпурны колер, археолагі выявілі ў грабніцы з залатым упрыгожаннем, дзе знаходзіліся парэшткі мужчыны. Побач з ёй знаходзіліся яшчэ дзве грабніцы. Усе пахаванні былі адкрытыя яшчэ ў 1970-х гадах непадалёк ад грэчаскага горада Вергіна.
Як паведамляе сайт Interesting Ingineering, дзякуючы паглыбленаму аналізу матэрыялу тунікі, грабніц і гістарычных звестак, даследчыкі толькі цяпер змаглі звязаць гэтую знаходку з Аляксандрам Македонскім. Вынікі апублікаваныя ў часопісе The Journal of Field Archaeology.
Даследчыкі адзначылі, што матэрыял, з якога вырабленая туніка, паходзіць з Персіі, гэтак жа, як і хунціт — мінерал, якім апрацавана тканіна для надання ёй характэрнага бляску. Гэта сведчыць пра тое, што туніка была створана ўжо пасля заваявання Аляксандрам Македонскім Персіі.
Для надання пурпурнага колеру быў выкарыстаны тырскі пурпур — рэдкі і дарагі фарбавальнік, даступны толькі вышэйшай знаці, які атрымлівалі з марскіх малюскаў. У старажытнасці пурпур асацыяваўся з раскошай і ўладай.
Сама туніка, верагодна, была сарпісам — традыцыйным адзеннем персідскіх цароў з белай паласой па цэнтры. Пасля перамогі над персідскім царом Дарыем III Аляксандр, відаць, прыняў гэты стыль. На фрызе грабніцы таксама захавалася сцэна палявання, дзе, на думку вучоных, намаляваны сам Аляксандр у пурпурнай туніцы з дзвюма белымі палосамі.
Сярод знойдзеных артэфактаў — залатая дыядэма, скіпетр і вянок з дубовага лісця, якія згадваюцца ў гістарычных апісаннях царскіх рэгалій Аляксандра. Вучоныя мяркуюць, што каралеўскую туніку і скіпетр, верагодна, атрымаў у спадчыну блізкі член сям'і — зводны брат Аляксандра, Філіп III Арыдэй, які пасля яго смерці стаў царом Македоніі.
Верагодна, ён і прывёз гэтыя рэчы ў Грэцыю. Менавіта ён, як лічаць вучоныя, пахаваны ў царскай грабніцы разам са сваёй жонкай Эдэяй Эўрыдыкай.
Цяпер чытаюць
Пракуратура пра смерць Мелказёрава: журналіст меў хранічную хваробу20
Каментары