15—18 лістапада фестываль інтэлектуальнай кнігі Pradmova пройдзе ў Варшаве на некалькіх пляцоўках. Фестываль збярэ розных аўтараў і аўтарак, мастачак і мастакоў, даследчыкаў і даследчыц і музыкаў, піша bellit.info.
Месцы правядзення фестывалю:
- Пляцоўка А — ul. Foksal, 11
- Пляцоўка B — ul. Foksal, 11
- Пляцоўка C — ul. Dożynkowa, 6a
- Клуб Scena Chmielna — Nowy Świat, 27A
- Prześwit — ul. Freta, 39
Некаторыя падзеі фестывалю (больш на сайце pradmova.eu):
Пятніца, 15 лістапада
Фестываль стартуе а 18:00 па пляцоўцы А ўрачыстай цырымоніяй і адкрыццём выставы ART PRADMOVA, што прадставіць творы ўдзельнікаў сёлетняга конкурсу — маладых дызайнераў і дызайнерак ды кніжных ілюстратараў і ілюстратарак.
Праграма дня працягнецца дыскусіяй «Доўгая дарога ад Быкава» з удзелам Святланы Курс, Андрэя Хадановіча, Андрэя Масквіна і Адама Міхніка. На завяршэнне вечара — канцэрт беларускіх гуртоў Разбітае Сэрца Пацана, Harotnica, Trava і Кміт-ансамбль, які стане сапраўдным святам беларускай музыкі.
Субота, 16 лістапада
Другі дзень фестывалю прапануе насычаную праграму на пляцоўках A і В. Госці змогуць наведаць дыскусіі пра беларукага Дастаеўскага і палітычную і культурную ідэнтычнасць краін Усходняй і Цэнтральнай Еўропы, абмеркаваць стратэгіі існавання беларускага тэатра ў эміграцыі і даведацца, як мова можа стаць сапраўдным героем эпасу. Апрача таго, госці фестывалю змогуць наведаць прэзентацыі манаграфій і даследаванняў па гісторыі і тэатральным мастацтве, а таксама новых выданняў беларускай і замежнай літаратуры.
Сярод іншых падзей дня — прэзентацыя кнігі Таццяны Шчытцовай пра беларускую рэвалюцыю, размова пра фемінізацыю беларускай мовы з Уладзіславам Гарбацкім, а таксама выступы беларускіх пісьменнікаў і пісьменніц, што плаўна перацякуць у Вечар Паэзіі.
На пляцоўцы С маленькіх і дарослых гасцей фестывалю чакае магчымасць паўдзельнічаць у разнастайных майстар-класах: стварэнне ілюстрацый з Эльгай Паповай, асваенне аналагавых тэхналогій пісьма з Антосем Сівых, варкшоп па трафарэтны друку са Святланай Дземідовіч і эксперымент з калажамі ад Ірыны Арахоўскай.
На большасць майстар-класаў патрэбная рэгістрацыя.
Нядзеля, 17 лістапада
Нядзеля, 17 лістапада, стане яркай кульмінацыяй фестывалю PRADMOVA, напоўненай разнастайнымі падзеямі, што аб’яднаюць музыку, літаратуру, дыскусіі і творчыя сустрэчы. Дзень распачнецца канцэртам Алеся Папковіча «Між берагамі»: аўтар праз музыку даследуе беларускую ідэнтычнасць і культурныя перасячэнні.
Праграма працягнецца абмеркаваннем сучаснага беларускага коміксу з Кацярынай Веразуб і Мікітам Сеннікавым, якія падзеляцца сваім досведам у стварэнні коміксаў і абмяркуюць іх ролю ў нацыянальнай культуры.
Госці таксама змогуць пазнаёміцца з навуковай спадчынай Вацлава Ластоўскага падчас прэзентацыі яго этнаграфічных і моўных даследаванняў.
Вольныя Купалаўцы падзеляцца досведам стварэння спектакля паводле кнігі Максіма Знака «Зэкамерон». Увечары чакаецца філасофска-літаратурная дыскусія пра спадчыну Чэслава Мілаша, апошняга грамадзяніна Вялікага Княства Літоўскага, а таксама прэзентацыя кнігі Юліі Чарняўскай «Свет пра цябе», прысвечанай Юрыю Зісеру.
Фінальнай падзеяй дня стане ўрачыстая цырымонія ўзнагароджання пераможцаў конкурсу ART PRADMOVA і канцэрт «Imagined Lover» ад Five Storey Ensemble, дзе сучаснай паэзія прагучыць у інтэрпрэтацыі беларускіх кампазітараў.
Панядзелак, 18 лістапада
Увечары панядзелка 18 лістапада ў межах Pradmova адбудуцца паказы спектакляў «Быкаў і яго д’яблы» (рэж. Васіль Дранько-Майсюк) і «Па што ідзеш, воўча?» (рэж. Моніка Дабраўлянска).
Дадатковыя актыўнасці
Фестываль прапануе ўдзельнікам унікальную магчымасць прыняць удзел у ролевым ларпе «Bring Your Own Bottle», дзе госці змогуць увасобіць сябе ў беларускіх творцаў і перажыць «апошнюю вечарыну».
Каментары