Кампаніі-пазоўнікі адзначаюць, што Google размясціла іх на незаслужана нізкіх радках у сваіх пошукавых рэйтынгах.
Еўрапейская камісія пачала антыманапольнае расследаванне адносна дзейнасці кампаніі Google, якое накіравана на высвятленне магчымых парушэнняў, што дапускаюцца карпарацыяй адносна сваіх канкурэнтаў, паведамляюць інфармагенцтвы.
Падставай для пачатку расследавання сталі скаргі, атрыманыя рэгулюючымі органамі Еўрапейскага саюза ад трох кампаній: французскай юрыдычнай пошукавай сістэмы ejustice.fr, брытанскай кампаніі Foundem, якая займаецца параўнаннем цэн, і сэрвісу электроннага гандлю Ciao, які нядаўна набыла кампанія Microsoft. Яны адзначаюць, што карпарацыя Google размясціла іх на незаслужана нізкіх радках у сваіх пошукавых рэйтынгах.Сцвярджаецца таксама, што Google злоўжывае сваім правам увядзення мінімальных ставак для рэкламадаўцаў. Доля рынку пошукавай рэкламы Google у Еўропе складае ўжо каля 90 працэнтаў, што нават больш за долю ў ЗША, дзе кампанія займае каля 80 працэнтаў рынку.
Карпарацыя Google была ўтворана ў 1998 годзе Сяргеем Брынам і Лэры Пейджам на аснове вучэбнага праекта BackRub, які яны распрацавалі, калі былі студэнтамі Стэнфардскага універсітэта ЗША. На сённяшні дзень Google - першая ў свеце па папулярнасці пошукавая сістэма, якая апрацоўвае больш за 40 млрд. запытаў у месяц.
Каментары