Лукашэнку не адпускае. Пасля прэс-службы і сам ён выказаўся пра адмову Дуды фатаграфавацца з ім на саміце ў Баку
«Ніхто не заўважыў, што яго няма. Бачыць ён, што яго не заўважылі, і пачаў піярыцца, што не пайшоў фатаграфавацца. Ну і не хадзі. Госпадзі, хто цябе там чакаў!»
Аляксандр Лукашэнка, адказваючы 14 лістапада на пытанні журналістаў, выказаўся пра дэмарш прэзідэнта Польшчы Анджэя Дуды на кліматычным саміце ў Баку.
«Адзін еўрапеец — калі б мне не расказаў Рыжанкоў, я не ведаў бы — адмовіўся фатаграфавацца («сямейнае фота» на саміце ў Баку), таму што там ёсць Лукашэнка. Ніхто гэтага нават не заўважыў. Я там стаяў спакойна. Падышоў пакістанскі прэм'ер, многія падышлі, прывіталіся з павагай. Ну, як сям'я. Ніхто не заўважыў, што яго няма. Бачыць ён, што яго не заўважылі, і ён пачаў піярыцца, што не пайшоў фатаграфавацца. Ну і не хадзі. Госпадзі, хто цябе там чакаў!» — сказаў Лукашэнка.
Акрамя гэтага, ён пакрытыкаваў і выступленне польскага прэзідэнта на саміце. Паводле Лукашэнкі, Анджэй Дуда расказваў, як Польшча беражэ жывёльны і раслінны свет, але не згадаў, як яго краіна пабудавала агароджу ў Белавежскай пушчы, «з-за чаго там цяпер гінуць звяры». «Яны ж жах што вытвараюць! Яны выразалі гэту Белавежскую пушчу, а ён пра расліны расказвае. Я ўжо не стаў яго там чапляць, хоць сабе пазначыў тэзісы. Думаю: ну нельга так», — заўважыў Лукашэнка, не назваўшы прычыны пабудовы Польшчай агароджы — мігранцкі крызіс.
Прэзідэнт Польшчы Анджэй Дуда 12 лістапада адмовіўся ўдзельнічаць у «сямейным фота» лідараў, якія прыехалі на кліматычны саміт у Баку. Прычынай стаў удзел у фатаграфаванні Лукашэнкі.
Канал «Пул першага» на наступны дзень, 13 лістапада, вырашыў абыграць гэты момант і апублікаваў фота «помсты» палітыка польскаму лідару. Выглядала гэта на ўзроўні пачатковай школы. Відавочна, што ўчынак Дуды моцна зачапіў Лукашэнку.
Цяпер чытаюць
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа31
Каментары