«Мы абавязаны». Дэпутат Дзярждумы РФ заклікаў выкарыстаць тактычную ядзерную зброю, каб прымусіць Украіну здацца
Расіі варта нанесці ядзерны ўдар па Украіне, каб вымусіць яе здацца, заявіў дэпутат Дзярждумы, лідар партыі «Радзіма» Аляксей Жураўлёў. На яго думку, «трэба біць так, каб вораг зразумеў, што ён мусіць капітуляваць», піша The Moscow Times.
«Ідуць дыскусіі: ці можам мы прымяняць тактычную ядзерную зброю, ці не можам. Слухайце, такой дыскусіі нават быць не павінна! У выпадку неабходнасці мы яе абавязаныя выкарыстоўваць… Трэба будзе біць — будзем біць. І гэта не абмяркоўваецца», — сказаў ён.
Раней пра тое, што прэзідэнт Уладзімір Пуцін рыхтуе эскалацыю ва Украіне і можа звярнуцца да тактычнай ядзернай зброі ў якасці апошняга сродку, каб не дапусціць паразы ў вайне, паведамілі блізкія да Крамля суразмоўцы Bloomberg.
25 жніўня ў Маскву нечакана прыбыў дырэктар ЦРУ ЗША Джон Рэткліф. Крыніцы Axios заявілі, што ён спрабаваў высветліць, ці можна ўтрымаць Пуціна ад эскалацыі і пераканаць яго вярнуцца да перамоў пра заканчэнне вайны.
The New York Times паведамляла, што Рэткліф даў «змрочную ацэнку» перспектыў расійскага войска і эканомікі і заклікаў укласці пагадненне, пакуль не стала занадта позна.
Пасля візіту дырэктара ЦРУ Расія правяла выпрабаванні ядзернай ракеты, якая дастае да ЗША, назву якой Мінабароны не раскрыла.
Пакуль прыкмет таго, што Пуцін рыхтуецца выкарыстаць ядзерную зброю, няма, адзначаў Bloomberg. Рэзка супраць выступаюць партнёры Расіі, у тым ліку Кітай, які строга перасцярог Крэмль ад такога кроку.
Пра наступствы ядзернага ўдару Пуціна папярэджвала і адміністрацыя экс-прэзідэнта ЗША Джо Байдэна. Тады ў Белым доме заявілі, што адказам будзе канвенцыйны ўдар амерыканскіх Узброеных сіл па Расіі, нагадала Фіёна Хіл, старшая навуковая супрацоўніца Brookings Institution, а ў мінулым — дарадчыца трох прэзідэнтаў ЗША.
Пуцін, паводле яе слоў, правярае, як далёка ён можа засці, перш чым людзі яму саступяць.
Цяпер чытаюць
Чым цяпер займаюцца дзяўчаты, якіх летась назвалі самымі прыгожымі ў Беларусі?3
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1919
Каментары