Не менш за 20 чалавек загінулі, і больш за 60 атрымалі раненні ў выніку ізраільскага авіяўдару па сталіцы Лівана. Жылы васьміпавярховы дом у цэнтры Бейрута быў цалкам знішчаны, яшчэ пяць суседніх будынкаў атрымалі пашкоджанні, піша Бі-бі-сі.
Ізраіль працягвае наступ на «Хезбалу». Мэтай удараў, магчыма, стаў кіраўнік службы знешняй бяспекі групоўкі. Паводле інфармацыі Нацыянальнага агенцтва навін Лівана, па цэнтральным раёне Баста ў Бейруце было выпушчана не менш за пяць ракет.
Выкарыстаная зброя была разлічана ў тым ліку на знішчэнне бункераў, і на месцы ўдару застаўся глыбокі кратэр.
«Удар быў настолькі моцным, што здавалася, што будынак вось-вось упадзе нам на галовы», — расказаў агенцтву AFP 60-гадовы Самір, які жыве ў будынку насупраць разбуранага.
Удар адбыўся каля чатырох гадзін раніцы па мясцовым часе.
Паводле слоў Саміра, ён выбег з дому разам з жонкай і двума дзецьмі: «Мы ўбачылі двух мёртвых людзей, якія ляжалі на зямлі… Дзеці пачалі плакаць, а іх маці плакала яшчэ больш».
Аб атацы ізраільскія вайсковыя ўлады загадзя не папярэджвалі і не заклікалі жыхароў эвакуявацца. Раней такія ўдары, якія Ізраіль наносіў без папярэджання за межамі раёнаў, дзе знаходзяцца баевікі «Хезбалы», былі нацэлены на высокапастаўленых членаў групоўкі.
Ці загінуў хтосьці з іх у гэты раз, пакуль не вядома. Ізраільскія афіцыйныя асобы пакуль не каментавалі здарэнне.
Ратавальныя службы працягваюць расчышчаць завалы на месцы ўдару, таму не выключана, што колькасць загінулых будзе расці. Ліванскае Міністэрства аховы здароўя заявіла, што для ідэнтыфікацыі ахвяр будуць выкарыстоўвацца тэсты ДНК.
Начны ўдар стаў ужо чацвёртай па ліку атакаю Ізраіля на цэнтр Бейрута за гэты тыдзень. Пасля гэтага ракетнага ўдару ізраільскія сілы працягнулі наносіць удары па паўднёвых ваколіцах Бейрута, якія лічацца аплотам «Хезбалы». У гэтым выпадку Армія абароны Ізраіля (ЦАХАЛ) аддала загад аб эвакуацыі жыхароў паўднёвага Бейрута, якія, паводле сцвярджэння ізраільскага боку, знаходзіліся «побач з аб'ектамі «Хезбалы».
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй43
Каментары