Адзін з самых вядомых сабораў у свеце і візітная картка Парыжа Нотр-Дам гатовы да адкрыцця пасля разбуральнага пажару і рамонту, які доўжыўся больш за пяць гадоў. У пятніцу прэзідэнт Францыі Эмануэль Макрон у суправаджэнні тэлекамер наведаў сабор, дзякуючы чаму з'явіліся першыя выявы абноўленай святыні, піша Бі-бі-сі.
Афіцыйнае адкрыццё адноўленага Нотр-Дам пройдзе 7 снежня і, як чакаецца, будзе абстаўлена з вялікай помпай.
У туры па саборы Макрона суправаджалі яго жонка Брыжыт і арцыбіскуп Парыжа Ларан Ульрых.
У дзень, калі адбыўся пажар, прэзідэнт Францыі паабяцаў, што гістарычны будынак будзе цалкам адноўлены, і адбудзецца гэта падчас яго прэзідэнцтва. На працягу шматгадовых рамонтных работ ён некалькі разоў наведваў будоўлю і трымаў працэс пад кантролем.
Вялізныя вітражныя вокны-ружы — адна з найбольш вядомых адметных рысаў парыжскага сабора. Арыгіналы ўзыходзяць да XIII стагоддзя, але да нашых дзён змагла дажыць толькі частка, многія вітражы былі знішчаныя падчас папярэдніх пажараў. Да канца не зразумела, колькі вокнаў і ў якой ступені пацярпелі пры апошнім пажары, але на фота прынамсі частка з іх выглядае цудоўна.
Таму завяршэнне рэстаўрацыйных работ у тэрмін можна лічыць вялікай асабістай перамогай Макрона. Паводле яго слоў, сабор як быццам прыдуманы зноўку і выглядае вельмі велічна.
Рэстаўрацыя сабора абышлася краіне ў 700 млн еўра. Частку гэтай сумы далі прыватныя інвестары. Па словах архітэктараў праекта, дрэва для дахавых работ, у асноўным дуб, збіралі з усёй Францыі. Менавіта гэтая частка храма — дах і шпіль — складалі найбольшую праблему пры аднаўленні. Да работ былі прыцягнутыя 250 будаўнічых кампаній і сотні спецыялістаў.
Пажар у саборы Парыжскай Божай Маці адбыўся ў красавіку 2019 года. Полымя знішчыла дах, гадзіннікі і шпіль, а таксама драўляныя элементы канструкцыі. Пажарныя, больш за 500 чалавек, змагаліся з агнём больш за дзевяць гадзін.
Цяпер знакаміты шпіль Нотр-Дама зноў узвышаецца над Парыжам. Першапачаткова ён быў усталяваны ў XII стагоддзі. За шматвяковую гісторыю будаўніцтва і дабудоўкі храма ён зведаў шэраг перамен, у тым ліку дэмантаж падчас Французскай рэвалюцыі і аднаўленне ў 1860-я гады. Яго вышыня — 96 метраў.
Паведамляецца, што з дня на дзень кіраўніцтва сабора чакае дастаўку мэблі, зробленай па спецзамове інвестараў. Усе астатнія дэталі інтэр'еру начышчаныя да бляску і гатовыя да ўрачыстага адкрыцця 7 снежня і да хуткіх калядных службаў.
Страх пустой прасторы. Што яднае готыку і савецкі бабушатнік?
У самым вялікім праваслаўным храме Украіны пабіліся вернікі дзвюх цэркваў
На самай вяршыні піраміды Хеопса ў Егіпце заўважылі сабаку
У Жыровіцкім манастыры разабралі іканастас, з якога раней выкінулі беларускія абразы
Старажытнасці з разрабаваных музеяў Судана прадаюцца за бесцань на аўкцыёнах
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары