Ісламісты, адказныя за выбух у «Крокусе», назвалі свае наступныя цэлі
«ІДІЛ-Харасан» пералічыў спіс цэляў для тэрарыстычных нападаў у наступным, сярод іх — Актобарфэст і Канскі кінафестываль, піша BILD.
Адгалінаванне ІДІЛ «Ісламская дзяржава ў правінцыі Харасан» на сваёй прапагандысцкай платформе назвала патэнцыйныя цэлі для нападаў сёлета: Актобарфэст у Мюнхене, карнавал у Венецыі, кінафестываль у Канах і оперны баль у Вене.
Менавіта гэтае адгалінаванне ІДІЛ узяло на сябе адказнасць за тэрарыстычную атаку на маскоўскі «Крокус Сіці Хол» амаль 10 месяцаў таму, у выніку якой загінула больш за 140 чалавек.
Супрацоўнік службы дзяржаўнай бяспекі ФРГ распавёў BILD, чаму да пагрозы варта ставіцца сур'ёзна: «Канфлікт з Ізраілем працягвае забяспечваць высокі ўзровень мабілізацыі сярод ісламістаў. Акрамя таго, нядаўнія тэракты паказалі, што дастаткова аўтамабіля або нажа. Патэнцыйныя нападнікі таксама гэта разумеюць».
«ІДІЛ-Харасан» раней стварала ў Германіі тэрарыстычныя ячэйкі, замаскіраваныя пад групы бежанцаў з Украіны. Органам бяспекі ўдалося раскрыць і прадухіліць планы нападаў. Так, год таму напярэдадні Калядаў і Новага года ісламісты з Таджыкістана, імаверна, збіраліся атакаваць Кёльнскі сабор і Сабор Святога Стэфана ў Вене.
Сем небяспечных ісламістаў знаходзяцца цяпер на лаве падсудных за планаванне нападаў на яўрэяў, ліберальных мусульман і калядны кірмаш у Германіі. Як мяркуецца, яны былі таемна перапраўленыя з Таджыкістана ў Заходнюю Еўропу. Ім прад'яўленыя абвінавачванні ў стварэнні і членстве ў тэрарыстычнай арганізацыі.
Паводле расследавання Федэральнага ведамства крымінальнай паліцыі Германіі, падазраваныя ў тэрарызме мелі на мэце «здзейсніць гучныя тэракты ў Германіі і Заходняй Еўропе, каб прасоўваць мэты і задачы «Ісламскай дзяржавы»». Для гэтага яны нават хацелі адсекчы галаву «нявернаму» ў мэтах застрашвання.
Каментары