Памятны камень, пастаўлены ў Горацкім раёне Магілёўскай вобласці, застаўся без шыльды.
Яе адсутнасць заўважылі чытачы выдання Reform.news.
Памятны камень кіраўніку паўстання 1794 года Тадэвушу Касцюшку паўстаў перад наведвальнікамі мясцінаў без шыльды. «Ці прыбралі, ці не ўзнавілі, хаця бачна, што помнікі побач прыводзілі ў парадак», — канстатавалі чытачы.
Як выглядаў камень да гэтага і што дакладна было напісана на шыльдзе, невядома. Найбольш верагодна, што імя Касцюшкі на камені згадвалася ў сувязі з падзеямі часоў вайны.
Да другой паловы ХХ стагоддзя вёска Касцюшкава называлася Трыгубава. У XVII стагоддзі ўваходзіла ў склад маёнтка Раманава Аршанскага павета Віцебскага ваяводства ВКЛ.
У час Другой сусветнай вайны вёска ў 1943 годзе была спалена нацыстамі. Трыгубава было вызвалена ў кастрычніку таго ж года ў выніку наступу 1-й польскай пяхотнай дывізіі імя Тадэвуша Касцюшкі, якая была сфарміраваная савецкімі ўладамі з польскіх грамадзян і этнічных палякаў.
Намеснік камандзіра батальёна капітан Уладзіслаў Высоцкі, які 12 кастрычніка 1943 года кіраваў у баях пад Леніна наступленнем на адказным участку, авалодаў апорным пунктам супраціўлення праціўніка і ўклініўся ў другую лінію варожай абароны каля вёскі Трыгубава, пасмяротна атрымаў званне Героя Савецкага Саюза.
У суседнім Леніне ў 1968 годзе створаны вялікі Музей савецка-польскай баявой садружнасці. У 1969 годзе вёска Трыгубава была перайменаваная ў Касцюшкава.
Такім чынам савецкія ўлады ўскосна спрычыніліся да ўшанавання на Магілёўшчыне імя Тадэвуша Касцюшкі, нацыянальнага героя Беларусі, Польшчы і ЗША, генерал-маёра арміі Рэчы Паспалітай, які змагаўся супраць Расійскай імперыі.
Каментары
хто ж я ёсць, як не літвін, зямляк ваш, вамі абраны?»
Тадэвуш Касцюшка
Не тое вы шкадуеце: шыльду з камення. Шкадуйце аб знікненні вашае дзяржавы Літвы, аб тым, што вы выракліся імя свайго народу, аб стагоддзях беларушчыны шкадуйце, аб страчанай волі ды незалежнасці.
Шкадуйце, плачце, выйце, бо змагацца ды вернуць страчанае, вы няздольныя.