Сенсацыйнае адкрыццё: звычайны сіроп ад кашлю абараняе ад дэменцыі
Навукоўцы з Канады зрабілі сенсацыйнае адкрыццё: амбраксол, які шырока выкарыстоўваецца ў Еўропе для палягчэння дыхання, здольны запаволіць развіццё дэменцыі пры хваробе Паркінсана.
Як паведамляе New Atlas, навукоўцы з даследчага інстытута Лоўсана пры клініцы Святога Язэпа ў канадскім Лондане на працягу 12 месяцаў праводзілі клінічнае даследаванне, якое ахапіла 55 пацыентаў з дэменцыяй, звязанай з хваробай Паркінсана. Частка ўдзельнікаў атрымлівала амбраксол, другая — плацэба. Медыкі сачылі за зменамі ў памяці, псіхічным стане і ўзроўні маркера GFAP — бялку, які сведчыць пра пашкоджанні мозгу.
Вынікі аказаліся шматабяцальнымі: узровень GFAP заставаўся стабільным у групе, якая атрымлівала амбраксол, а ў групе з плацэба ён павялічыўся. Акрамя таго, у тых, хто прымаў амбраксол, не назіралася пагаршэння псіхічнага стану, у адрозненне ад кантрольнай групы. Асобы з высокай генетычнай рызыкай (мутацыі ў гене GBA1) нават прадэманстравалі паляпшэнне кагнітыўных функцый.
Чаму гэта важна
Паркінсанічная дэмэнцыя (PDD), падобна да іншых формаў дэменцыі, праяўляецца стратай памяці, галюцынацыямі, дэзарыентацыяй і перападамі настрою. Паводле медыцынскіх даных, прыкладна палова ўсіх пацыентаў з хваробай Паркінсана сутыкаецца з дэменцыяй на працягу дзесяці гадоў пасля пачатку хваробы.
Сучасныя метады лячэння пераважна палягчаюць сімптомы, але не ўплываюць на саму хваробу. Амбраксол жа можа стаць першым недарагім і бяспечным прэпаратам, здольным тармазіць развіццё паталогіі, а не толькі маскаваць яе наступствы.
Асноўны механізм дзеяння прэпарату звязаны з павышэннем узроўню ферменту глюкацэрэбразідазы (GCase), які сінтэзуецца генам GBA1. Пры хваробе Паркінсана ўзровень гэтага ферменту звычайна зніжаны, што вядзе да назапашвання адкідаў у клетках мозгу і іх пашкоджання. Амбраксол павышае яго колькасць і дапамагае змякчыць гэтыя наступствы, абараняючы нейроны.
У Еўропе амбраксол шырока выкарыстоўваецца як безрэцэптурны сродак пры кашлю і бранхіце. Аднак у Канадзе, ЗША і Аўстраліі ён пакуль дазволены для ўжывання чалавекам толькі ў межах навуковых даследаванняў або ў якасці ветэрынарнага прэпарата для лячэння хворых коней і сабак.
Тым не менш, цікавасць да гэтага прэпарата расце. У Аўстраліі праводзяцца даследаванні яго дзеяння пры бакавым аміятрафічным склерозе, а вучоныя Канады ў іншым даследаванні вывучаюць уздзеянне гэтага прэпарата на пацыентаў, што пакутуюць на рэдкае генетычнае захворванне, вядомае як хвароба Гашэ, звязанае з дэфіцытам фермента GCase.
«Гэта даследаванне жыццёва важнае, таму што дэменцыя пры хваробе Паркінсана моцна ўплывае на пацыентаў і іх сем'і», — цытуе выданне кіраўніка даследавання доктара Стэфана Пастарнака.
Артыкул з вынікамі даследавання апублікаваны ў аўтарытэтным медыцынскім часопісе JAMA Neurology. Далейшыя даследаванні павінны пацвердзіць эфектыўнасць і распрацаваць схемы бяспечнага прымянення амбраксола як нейрапратэктара.
Каментары