«Не хапіла аднаго бала». Маці абурылася, што яе дачку не прынялі ў дзясяты клас гімназіі
У справу ўмяшаліся чыноўнікі. Чым скончылася?
Жыхарка Фаніпаля Алена расказала ў тыктоку, што яе дачку не залічылі ў 10-ы клас гімназіі. Прычынай стала тое, што дзяўчынцы не хапіла аднаго бала. Маці абуралася, што пра немагчымасць перавесці дзіця ёй паведамілі толькі 19 жніўня, калі прыёмная кампанія ўжо завяршылася.
Калі жанчына прыйшла на сустрэчу з дырэктарам і запытала дакумент, дзе пазначаны канкрэтны прахадны бал, ёй адказалі, што ў гімназіі конкурсная аснова, і бал не назвалі. Маці дзяўчынкі папрасіла пісьмовую адмову аб залічэнні. Яна сцвярджае, што паперу так і не выдалі. Дакументы яна таксама не забрала.
«Абурэнне мяне распірае», — эмацыйна выказалася жанчына.
Просто ужас,нет диалога,чтоб пойти в гимназию нужно пройти семь кругов Ада,и это не шутка……
У канцы мінулага навучальнага года на сайце гімназіі апублікавалі парадак прыёму ў 10-ы клас. Было выдзелена 50 месцаў для двух профільных класаў: з паглыбленым вывучэннем матэматыкі і фізікі, а таксама грамадазнаўства і англійскай мовы. Дакументы прымалі з 12 чэрвеня па 15 жніўня на конкурснай аснове. Да конкурсу дапускаліся дзеці, якія маюць у пасведчанні аб агульнай базавай адукацыі адзнакі не ніжэйшыя за 7 балаў па кожным з прадметаў, выбраных для вывучэння на павышаным узроўні, і сярэдні бал у пасведчанні не ніжэйшы за 7.
Дырэктарка гімназіі Галіна Майсейчык патлумачыла парталу fanipol.by сітуацыю, якая склалася:
«Сёлета ў нас упершыню сфармаваўся конкурс, дакументы падавалі і на дзяцей з іншых населеных пунктаў. Так, на 50 месцаў паступіла 66 заяў. Паколькі ў 11 класе ў нас набралася 46 чалавек замест 50-ці, у дзясятыя мы змаглі залічыць 54 навучэнцаў. Астатнім прапанавалі перайсці ў сярэднюю школу №2 Фаніпаля».
Адносна тэрмінаў паведамлення бацькам пра вынікі дырэктар патлумачыла:
«17 жніўня завершаны прыём дакументаў. 18 жніўня праводзілася пасяджэнне прыёмнай камісіі ў 10-ы клас. І толькі тады мы ведалі напэўна, хто дакладна пройдзе, а хто не. Хоць папярэдне, да гэтага, мы бачылі, хто не паступіць, і я стэлефаноўвалася з бацькамі, і ў прыватнасці з Аленай Мякотай.
Бацькоў абтэлефаноўвала ў момант, калі ў каледжах праводзіўся набор на бюджэтную форму навучання, каб дзеці мелі магчымасць паступіць. Якраз з Аленай Уладзіміраўнай нам тады стэлефанавацца ўдалося, і гэты момант мы прагаварылі».
Пасля апрацоўкі ўсіх заяў прахадны бал сфарміраваўся на ўзроўні 24 — ён складаецца з сярэдняга бала пасведчання аб агульнай базавай адукацыі і дзвюх адзнак па профільных прадметах.
Да 21 жніўня сітуацыя вырашылася, піша партал.
Сама маці расказала пазней у тыктоку, што ёй пазванілі з упраўлення адукацыі райвыканкама і сказалі, што яе дачку залічылі ў 10-ы клас.
Благодарю Вас мои дорогие,Вы лучшие!!!!!!безумно счастлива !!!!!!!!!
У цяперашні час гімназія збірае пакет дакументаў для ўнясення змяненняў у дзеючую ліцэнзію, каб павялічыць кантрольныя лічбы набору на трэцюю прыступку навучання — са 100 да 120 чалавек. Дзякуючы гэтаму ў навучальным годзе 2025/2026 будуць залічаны ўсе дзеці, якія падалі дакументы для навучання ў гімназіі ў 10-м класе і якія маюць адзнакі не ніжэй за 7 балаў.
Цяпер чытаюць
«Свінні зарохкалі. Без вады даўно не сядзелі, я б ім адключыў». Азаронак абрынуўся на жыхароў раёна Лебядзіны22
Каментары