Для брэсцкай мэблева-фурнітурнай кампаніі AKS расійскі рынак расце хутчэй, чым польскі
У мінулым годзе працягвала падаць выручка і, адпаведна, доля ў агульным бізнэсе польскага філіяла брэсцкай кампаніі «Акс-мэбля». Гэта — даволі буйны вытворца мэблевай фурнітуры і мэблі для офісаў, дамоў і кавярняў, прысутны на рынку Беларусі з 2006 года, піша эканамічны аглядальнік Вадзім Сяховіч.
У 2012 годзе ўладальнікі «Акс-мэблі» на чале з Віктарам Шосцікам выйшлі на расійскі рынак, стварыўшы ў Бранску кампанію «Базістрэйд». А з 2021 года спрабуюць асвойваць рынкі Усходняй і Заходняй Еўропы праз зарэгістраваную ў Белай-Падлясцы кампанію Aks.
У 2022 годзе продажы Aks, што ажыццяўляюцца праз інтэрнэт-краму, дасягнулі 10,5 млн злотых. Але за апошнія два гады яны знізіліся, склаўшы адпаведна 6,6 млн злотых у 2023 годзе і 5,8 млн у 2024 годзе. У 2023—2024 гадах польская Aks прынесла сваім уладальнікам страты.
У адрозненне ад яе, расійскі бізнэс Віктара Шосціка расце. Па выручцы ў 2024 годзе (звыш 580 млн расійскіх рублёў) ён быў больш чым у чатыры разы буйнейшы за польскі і прыносіць прыбытак на працягу апошніх гадоў. Таксама «Акс-мэбля» актыўна асвойвае з дапамогай мясцовага партнёра рынак Казахстана.
Фінансавых паказчыкаў па беларускім рынку няма. Але, мяркуючы па актыўным пашырэнні тут афлайн-сеткі фурнітурных шоурумаў, на ім таксама назіраецца рост. У мінулым годзе, напрыклад, уладальнікі «Акс-мэблі» адкрылі новыя гандлёвыя пункты AKS у Баранавічах, Мінску, Лідзе і Мазыры. У жніўні гэтага года чарговы, 14-ы шоўрум, пачаў працаваць у Пінску.
Цяпер чытаюць
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5959
Каментары