Ва Украіне арыштавалі прарасійскага дэпутата Вярхоўнай Рады. Яго нібыта выдалі з ААЭ
Служба бяспекі Украіны затрымала і арыштавала дэпутата Вярхоўнай Рады ад прарасійскай «Апазіцыйнай платформы — За жыццё» Фёдара Хрыстэнку. Яго падазраюць у дзяржаўнай здрадзе, піша «Украінская праўда».
Украінскае следства мяркуе, што Хрыстэнку яшчэ да пачатку поўнамаштабнай вайны завербавала ФСБ і ён выконваў заданні расійскай спецслужбы, спрабуючы ўплываць на кіраўніцтва Нацыянальнага антыкарупцыйнага бюро Украіны.
Паведамляецца, што Фёдар Хрыстэнка нібыта меў блізкія сувязі з асобнымі кіраўнікамі гэтага органа, у тым ліку з Русланам Магамедрасулавым, якога ў ліпені затрымала Службы бяспекі Украіны па падазрэнні ў вядзенні бізнэсу з Расіяй.
Хрыстэнку арыштавалі на тэрыторыі Украіны, але перад тым, як сцвярджаецца, ён знаходзіўся ў Аб'яднаных Арабскіх Эміратах.
Як сцвярджае выданне Zn.ua, былога дэпутата вярнулі з ААЭ ва Украіну не праз афіцыйную экстрадыцыю, а па палітычнай дамоўленасці паміж уладамі дзвюх краін.
Паводле крыніц выдання, вяртанне Хрыстэнкі адбывалася пад асабістым кантролем высокапастаўленых асоб. З украінскага боку гэтым займаўся былы міністр абароны Рустэм Умераў па даручэнні прэзідэнта Украіны Уладзіміра Зяленскага. У ААЭ нават ездзіў намеснік кіраўніка СБУ Аляксандр Паклад, пасля чаго Хрыстэнка «добраахвотна» пагадзіўся вярнуцца.
Адразу пасля затрымання Хрыстэнку даставілі ў суд, дзе яму вызначылі мерай стрымання ўтрыманне пад вартай.
Каментары