За «заклікі да нанясення шкоды Беларусі» асудзілі маладога супрацоўніка «Пеленга»
Стала вядома пра яшчэ аднаго супрацоўніка прадпрыемства «Пеленг», якога асудзілі па палітычным артыкуле. Арцём Сямёнаў працаваў у Бюро мытна-ліцэнзійнага забеспячэння і экспартнага кантролю. Яму магло пагражаць да 12 гадоў калоніі.
Арцёму Сямёнаву 34 гады. Ён скончыў Беларускі дзяржаўны ўніверсітэт у 2012 годзе.
Доўгі час Арцём працаваў на аптычным прадпрыемстве «Сфера», якое ўваходзіць у Беларускае оптамеханічнае аб'яднанне і стварае аптычныя элементы — лінзы, прызмы, сеткі і гэтай далей. «Сферай» валодае ААТ «Пеленг» — у прадпрыемстваў нават агульны спіс супрацоўнікаў ва ўнутраных рэсурсах.
Арцём быў юрысконсультам у Бюро мытна-ліцэнзійнага забеспячэння і экспартнага кантролю. Ён працаваў там прынамсі да лета 2024 года. Невядома, калі Сямёнаў быў арыштаваны, але апошні раз ён быў анлайн у сацсетках у лістападзе 2024-га.
Прысуд і тое, у чым канкрэтна яго абвінавачвалі, — невядомыя, але пагражала хлопцу да 12 гадоў калоніі. Арцёма Сямёнава асудзілі па абвінавачанні ў «дзеяннях, накіраваных на прычынення шкоды Беларусі» і ўнеслі ў спіс «тэрарыстаў», які стварае КДБ.
Аблава КДБ на супрацоўнікаў «Пеленга» і іншых абарончых прадпрыемстваў пад яго крылом пачалася ўлетку 2024 года і працягвалася некалькі месяцаў. Яна звязаная са злівам дакументаў прадпрыемства, якія датычыліся абыходу санкцыяў. Былі апытаныя амаль усе супрацоўнікі, звольненыя дзясяткі людзей, як мінімум шэсць супрацоўнікаў былі асуджаныя па палітычных артыкулах — за ўдзел у пратэстах і «заклікі да прычынення шкоды Беларусі».
«Пеленг» — адно з ключавых прадпрыемстваў беларускай абарончай прамысловасці. Яно стварае прыцэлы для расійскіх танкаў, спадарожнікі і шэраг іншых вырабаў, важных для Расіі падчас вайны. Раней прадпрыемства працавала і з Украінай — напрыклад, украінская супрацьтанкавая ракетная ўстаноўка стваралася сумесна з «Пеленгам».
«Наша Нiва» — бастыён беларушчыны
ПАДТРЫМАЦЬ
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі15
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары