На фронце забілі сына аднаго з самых няўдалых камандзіраў расійскай арміі
Калі ў лютым 2022 года Аркадзь Марзоеў адпраўляў сваіх дэсантнікаў наступаць на Херсон і штурмаваць аэрапорт Мікалаева, за пару дзён загінула 76 з іх. А калі Пуцін даў Марзоеву ордэн, адзін з яго падначаленых, «герой Расіі», застрэліўся.
На акупаванай тэрыторыі Запарожскай вобласці загінуў расійскі лейтэнант Васіль Марзоеў — сын камандуючага 18‑й агульнавайсковай арміяй Паўднёвай вайсковай акругі генерал-лейтэнанта Аркадзя Марзоева.
Як заявіў кіраўнік Паўночнай Асеціі Сяргей Мяняйла, Васіль Марзоеў быў камандзірам разведвальнага ўзвода 108‑га парашутна-дэсантнага палка сёмай дэсантна-штурмавой дывізіі.
Пры якіх абставінах загінуў Марзоеў — невядома. Хутчэй за ўсё, ён трапіў пад абстрэл.
За «баявыя заслугі» Васіль Марзоеў пасмяротна прадстаўлены да звання героя Расіі.
Бацька Васіля — Аркадзь Марзоеў — з 1992 года служыў у спецназе ГРУ ў Закаўказзі, быў удзельнікам дзвюх чачэнскіх войнаў. Даслужыўся да пасады камандзіра мотастралковага палка 58‑й арміі, які ў жніўні 2008‑га ўдзельнічаў у акупацыі Паўднёвай Асеціі.
З 2014 года Марзоеў-старэйшы — камандзір 138‑й асобнай гвардзейскай мотастралковай брыгады Заходняй вайсковай акругі, якая ў 2014 годзе брала ўдзел у вайне з Украінай на Данбасе.
У студзені — лютым 2015 года брыгада пад камандаваннем Марзоева панесла цяжкія страты ў баях за Дэбальцава.
Пасля, пабыўшы некалькі месяцаў у камандзіроўцы ў Сірыі, палкоўнік Марзоеў у снежні 2016 года стаў генерал-маёрам.
Са студзеня 2021 года генерал-маёр Аркадзь Марзоеў камандаваў 22‑м армейскім корпусам у Крыме — асновай сухапутных сіл на паўвостраве.
Падчас уварвання Расіі ва Украіну ў 2022 годзе ён быў адным з камандуючых паўднёвай групоўкай расійскіх войскаў. Паводле аповедаў падначаленых, апублікаваных Бі-бі-сі ў чэрвені 2023 года, 24 лютага 2022 года Марзоеў адправіў дэсантнікаў 247‑га палка наступаць на Херсон, запэўніўшы афіцэраў, што разведка праведзеная і траса на горад вольная. Аднак у выніку вайскоўцы трапілі ў засаду УСУ і панеслі крытычныя страты.
Праз два дні сітуацыя паўтарылася: гэтым разам дэсантнікі спрабавалі штурмаваць аэрапорт Мікалаева, падчас чаго ўсяго за два дні 247‑ы дэсантна-штурмавы полк страціў 76 чалавек забітымі і каля 140 параненымі.
Марзоеў-старэйшы ў лютым — сакавіку 2022 года ўзначальваў наступ на Мікалаеў. На подступах да горада полк пад камандаваннем Марзоева трапіў у акружэнне і быў разгромлены.
У лютым 2023 года расійскі Z-блогер «Трынаццаты» абвінавачваў Марзоева таксама ў тым, што той, хоць і ведаў пра адыход расійскіх вайскоўцаў з Херсона, не арганізаваў падрыхтоўку абароны астравоў на Дняпры: «Адзін толькі Пацёмкін востраў чаго каштуе, колькі там хлопцаў загінула».
У снежні 2022 года Аркадзю Марзоеву было прысвоена званне генерал-лейтэнанта.
У чэрвені 2023 года Марзоеў атрымаў ад Пуціна ордэн Аляксандра Неўскага. У гэты ж дзень застрэліўся яго былы падначалены, герой Расіі палкоўнік Дзмітрый Лісіцкі. Гэта яго полк быў разбіты пад Херсонам, калі выконваў заданне Марзоева.
У жніўні 2023 года Марзоеў быў прызначаны камандуючым 18‑й агульнавайсковай арміяй.
Дарэчы, у сям'і Марзоевых гэта не першае званне героя Расіі пасмяротна. Намеснік камандуючага 58‑й арміі Станіслаў Марзоеў — брат Аркадзя і, адпаведна, дзядзька Васіля, — атрымаў гэта званне ў 2002-м, калі яго верталёт збілі чачэнцы.
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу5
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары
даволі трапнае супадзенне