З-за рэкорднай колькасці запушчаных з Беларусі метэазондаў Літва часова спыняла працу пераходаў на мяжы

У ноч на сераду Літва часова прыпыняла пропуск асоб і транспартных сродкаў у двух наземных пунктах кантролю на мяжы з Беларуссю — у Медніках і Салечніках (з беларускага боку — Каменны Лог і Беняконі).

Гэта мера гарантавання бяспекі Літвы, звязаная з паветранымі шарамі, запушчанымі ўначы з Беларусі ў Літву, гаворыцца ў паведамленні Памежнай службы.

У такі час сутак рух і патокі праз абодва згаданыя пункты мінімальныя. Асаблівых падзей або інцыдэнтаў да раніцы серады з-за закрыцця пунктаў не зафіксавана ні на іх тэрыторыі, ні ў прыбліжаных зонах.

З вечара з-за кантрабандных метэазондаў, запушчаных з Беларусі, быў закрыты аэрапорт Вільні.

Аэрапорт прыпыніў сваю працу 21 кастрычніка ў 22:23. Рэйсы з Лісабона, Антальі, Трэвіза, Барселоны перанакіравалі ў Коўна, з Франкфурта і Берліна — у Рыгу, з Лондана — у Варшаву, з Капенгагена — у Палангу. Самалёт са Стакгольма вярнуўся ў аэрапорт адпраўлення.

Месяц таму, калі Польшча закрывала мяжу з Беларуссю падчас беларуска-расійскіх вучэнняў «Захад», міністр унутраных спраў Літвы Уладзіслаў Кандратовіч тлумачыў, у якіх выпадках Літва закрые мяжу.

«Калі здарыцца (правакацыя), кіраўнік памежнай аховы гатовы ў тую ж хвіліну даць дазвол на закрыццё мяжы. (…) Калі нешта адбываецца, дрон або правакацыя, ці нейкі невыразны павышаны рух сіл ля мяжы, мы можам гэта зрабіць», — казаў тады Кандратовіч.

З ягоных слоў, пазней пастанову на больш працяглы тэрмін закрыць мяжу павінен прыняць урад Літвы.

Кіраўнік Нацыянальнага цэнтра кіравання крызісамі Вілмантас Віткаўскас у эфіры LRT Radijas заявіў, што гэта адна з самых інтэнсіўных акцый па дастаўцы кантрабандных цыгарэт з дапамогай паветраных шароў у Літву сёлета.

«Падавалася, што інтэнсіўнасць спынілася — і вось гэтай ноччу мы атрымалі, бадай, самую інтэнсіўную інвазію кантрабандных цыгарэт з дапамогай паветраных шарыкаў у нашую краіну сёлета. Гэта інтэнсіўнасць вымяраецца двума параметрамі: часавай воссю, на працягу якой запускаліся шарыкі ў нашую краіну, і колькасцю. Таму былі прыняты рашэнні паветранай навігацыі прыпыніць палёты, каб гарантаваць бяспеку грамадзянскай авіяцыі», — кажа В. Віткаўскас.

Паводле кіраўніка НЦКК, шарыкі з кантрабандай, што прыляцелі з Беларусі, былі знойдзены ўжо ў пяці рэгіёнах: у Лаздзейскім раёне, у Друскеніках, у раёнах Аран, Салечнікаў, у Вільні.

«Апошняя хваля была зафіксаваная непадалёк ад аэрапорта. Геаграфія вельмі шырокая, гэта сведчыць пра тое, што інтэнсіўнасць запуску шарыкаў была вельмі высокая. Хутчэй за ўсё, запуск адбываўся не з аднаго пункта, а была каардынаваная аперацыя», — кажа В. Віткаускас.

Прадстаўнік Нацыянальнага цэнтра кіравання крызісамі (НЦКК) Дарус Бута паведаміў што адзін чалавек быў затрыманы, знойдзена восем шароў. «Пацярпелі каля 30 рэйсаў. З іх 14 рэйсаў, што ляцелі ў Вільню, былі накіраваныя ў іншыя аэрапорты. Найбольшая колькасць самалётаў прызямлілася ў аэрапорце Коўна — 10 рэйсаў былі скіраваныя туды. У аэрапорт Рыгі былі накіраваныя 2 рэйсы, па 1 — у Палангу і Варшаву. Таксама 10 рэйсаў былі скасаваныя, а адзін самалёт вярнуўся ў аэрапорт вылету», — адзначыў ён.

Ёсць 5 рэйсаў, якія затрымаліся з вылетам з аэрапорта Вільні.

Праца памежных пераходаў аднавілася пад ранак.

• 9
• 0
• 1
• 2
• 2
• 1
• 2
• 0