Прарасійскую блогерку Таццяну Манцян, якая часта з'яўляецца ў роліках беларускай прапаганды, у Расіі абвясцілі «экстрэмісткай»
Манцян ўнеслі ў рэестр тэрарыстаў і экстрэмістаў Расфінманіторынга. Яна вядомая тым, што падтрымлівала палітыку Крамля. У 2021 годзе жанчына пераехала з Украіны ў Расію.
Расфінманіторынг унёс Таццяну Манцян у свой спіс экстрэмістаў і тэрарыстаў 27 кастрычніка. Пра прычыны такога рашэння не паведамляецца, інфармацыі аб завядзенні крымінальнай справы на журналістку таксама не было, піша «Вот Так».
Пры гэтым кіраўнік «Лігі бяспечнага Інтэрнэту» Кацярына Мізуліна раней заявіла, што яе арганізацыя звярнулася ў МУС Расіі пасля шматлікіх скаргаў грамадзян на публікацыі Манцян, якія, на іх думку, дыскрэдытавалі расійскае войска.
Блогерку таксама крытыкаваў Уладзімір Салаўёў: у чэрвені гэтага года ён абвінаваціў Манцян у прысваенні сродкаў, сабраных для патрэб арміі.
Тэлеграм-канал ВЧК-ОГПУ пісаў, што ў снежні 2024 года Манцян купіла ў Маскве кватэру і парковачнае месца агульным коштам не менш за 25 мільёны расійскіх рублёў.
Пры гэтым пакуль невядома, якія менавіта выказванні і дзеянні сталі падставай для ўнясення блогеркі ў спіс тэрарыстаў і экстрэмістаў. Таксама незразумела, ці знаходзіцца яна цяпер у Расіі.
Таццяна Мануян — юрыстка і блогерка, нарадзілася 29 жніўня 1972 года ў Крыме. У 12 гадоў разам з сям'ёй пераехала ў Херсон, дзе скончыла гімназію. У 1994 годзе атрымала юрыдычную адукацыю ў Маскоўскім дзяржаўным універсітэце, спецыялізавалася на канстытуцыйным і ісламскім праве. Пасля вучобы займалася адвакацкай практыкай.
У 2021 годзе Манцян пераехала ў Расію. Яна супрацоўнічала з тэлеканалам RT як калумністка і рэгулярна з'яўлялася ў эфірах федэральных тэлеканалаў, выказваючыся ў падтрымку расійскага ўварвання ва Украіну.
Таксама Манцян была частай госцяй на беларускім дзяржаўным тэлебачанні. Яна рэгулярна каментавала навіны для БелТА.
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары