Пра фіксацыю каля Бярозаўскай ДРЭС масавай гібелі рыбы паведамілі ў Міністэрстве прыродных рэсурсаў. Паводле яго інфармацыі, здарэнне адбылося ў тэхналагічным канале, які выкарыстоўваецца для скіду падагрэтай вады з электрастанцыі і яе наступнага астуджэння ў Белым возеры.
На месца здарэння аператыўна выехалі спецыялісты Рэспубліканскага цэнтра аналітычнага кантролю, «Белгідрамета», а таксама прадстаўнікі мясцовых інспекцый па ахове жывёльнага і расліннага свету і навакольнага асяроддзя.
Падчас папярэдняга агляду праверка высветліла, што загінула рыба аднаго віду — карась, і ўсе асобіны былі прыкладна аднаго памеру. Пры гэтым акурат карась лічыцца даволі трывалым відам, не адчувальным да многіх таксічных рэчываў.
Улічваючы, што канал з’яўляецца тэхналагічным аб’ектам, тэмпература вады ў ім можа перыядычна быць даволі высокай. Па першых выніках праверак, узровень кіслароду ў вадзе адпавядае норме.
Цяпер спецыялісты працягваюць даследаванні хімічнага складу вады, каб дакладна вызначыць прычыны гібелі рыбы.
Самі энергетыкі, як паведамляецца, сумесна з прадстаўнікамі прыродаахоўных ведамстваў вядуць пастаянны маніторынг сітуацыі. Спецыялісты сцвярджаюць, што перавышэнняў нормаў па выкідах на ДРЭС не было. У якасці асноўных цяпер разглядаюцца прычыны прыроднага характару, уключаючы вылучэнне таксінаў багавіннем.
Цяпер чытаюць
«Дзед будзе глядзець асабіста. Калі яму спадабаецца…» Зянковіч расказаў, як з ім запісвалі першае інтэрв'ю ў СІЗА КДБ14
Каментары