Трамп падпісаў часовы бюджэт. Самы доўгі ў гісторыі ЗША шатдаўн завершаны
У сераду вечарам Палата прадстаўнікоў ЗША прагаласавала за праект бюджэту, які неўзабаве падпісаў прэзідэнт Трамп. Работа федэральнага ўрада адновіцца пасля рэкорднага 43‑дзённага перапынку, пiша Бі-бі-сі.
Часовы бюджэт паступіў на подпіс да прэзідэнта Дональда Трампа позна ўвечары ў сераду, праз дзве гадзіны пасля таго, як праект падтрымалі 222 члены Палаты прадстаўнікоў. Для яго зацвярджэння была неабходная простая большасць галасоў.
Раней праект бюджэту ўжо быў ухвалены Сенатам ЗША.
У цяперашнім складзе Палаты ў рэспубліканцаў 219 мандатаў супраць 214 у дэмакратаў (усяго 433, два месцы ў цяперашні час вакантныя). Простая большасць, такім чынам, складае 217 галасоў.
Аднак увечары ў сераду ў зале адсутнічалі чатыры кангрэсмены: трое рэспубліканцаў і адзін дэмакрат. Гэта знізіла неабходны для прыняцця праекта бюджэту бар'ер да 215 галасоў, які ў выніку быў пераадолены з запасам.
Гэта стала магчымым таму, што дакумент быў падтрыманы не толькі 216 рэспубліканцамі, але і шасцю дэмакратамі. Пры гэтым два прадстаўнікі Рэспубліканскай партыі прагаласавалі супраць разам з 207 дэмакратамі.
Пасля таго як часовы бюджэт падпісаў прэзідэнт, урад адновіць працу, і самы доўгі ў гісторыі ЗША шатдаўн завершыцца. Папярэдні рэкорд (35 дзён) таксама быў усталяваны пры прэзідэнце Трампе, але падчас яго першага тэрміну.
Падпісаўшы бюджэт у прысутнасці вялікай колькасці тэлекамер, Трамп назваў дзень заканчэння шатдаўна «вялікім».
Што зменіцца пасля заканчэння шатдаўна?
Праект, прыняты ў сераду, дазволіць федэральнаму ўраду працаваць яшчэ два з невялікім месяцы — да 30 студзеня 2026 года. Прыняты праект бюджэту гарантуе, што ўсе федэральныя міністэрствы і агенцтвы адновяць працу, іх фінансаванне забяспечана да 30 студзеня 2026 года. Акрамя таго, гэта азначае, што выкліканыя шатдаўнам звальненні і скарачэнні федэральных служачых спыняцца.
Тым работнікам, хто з-за шатдаўна быў адпраўлены ў адпачынак або быў вымушаны працаваць без аплаты (як, напрыклад, авіядыспетчары), у мінулым выплачвалі заробак заднім чыслом.
Некаторыя праграмы, якія былі гэтай восенню пастаўлены на паўзу з-за шатдаўна — у тым ліку харчовая праграма SNAP для маламаёмных — будуць прафінансаваны прынятым праектам бюджэту да канца наступнага фінансавага года, гэта значыць да канца верасня 2026 года. Новы прыпынак працы ўрада, калі ён здарыцца за гэты час, іх ужо не закране.
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень12
Каментары