Чыноўнікі пракаментавалі нашумелую навіну пра бальніцу ў Гомельскай вобласці. Кажуць, што не закрылі — проста перанеслі на 30 км
Прапагандысты кінуліся абвяргаць інфармацыю пра тое, што ў Гомельскай вобласці ціха закрылі бальніцу, назваўшы гэта рэарганізацыяй.
Відэа з кадрамі часткова закінутай тэрыторыі Свяцілавіцкай участковай бальніцы ў Веткаўскім раёне заўважыў «Флагшток».
Пад ролікам з'явілася мноства каментароў: людзі выказалі жаль з нагоды таго, што будынак некалі папулярнай медустановы апусцеў, і абурэнне, што «ўсё развалілі».
Раней чыноўнікі заяўлялі, што ўстанову Свяцілавіцкую ўчастковую бальніцу захаваюць.
«Свяцілавіцкая бальніца будзе існаваць. І ўзровень медыцынскай дапамогі захаваецца тут на ранейшым узроўні. Гэта датычыцца і рэабілітацыйнага аддзялення, паслугі якога цэняць далёка за межамі Веткаўскага раёна, і ложкаў сястрынскага догляду, запатрабаванасць якіх вельмі высокая, і тэрапеўтычнага аддзялення, дзе можна атрымаць першую дапамогу», — казаў экс-кіраўнік абласнога ўпраўлення аховы здароўя, дэпутат парламента Мікалай Васількоў.
Цяпер жа, па словах мясцовых жыхароў, адзінае, што засталося ў Свяцілавіцкай бальніцы — гэта аддзяленне сястрынскага догляду, «і тое, кажуць, толькі да канца года», пісаў «Флагшток».
«З ліквідацыяй бальніцы вёска Свяцілавічы, якой быў прысвоены статус аграгарадка, перажывае сваё другое паміранне — пасля першага, праз чарнобыльскую катастрофу», падсумавала выданне.
Прапагандысты паехалі на месца «развейваць фэйкі».
«Так, медустанова выглядае сціпла, але ў тым, што тут па-ранейшаму працягваюць аказваць меддапамогу насельніцтву, сумневаў няма», — піша «Сельская газета».
А аддзяленне рэабілітацыі, якое «лічылася адным з найлепшых у вобласці» не закрытае, а перанесена за 30 км, кажуць чыноўнікі.
— Міжраённае аддзяленне ранняй медыцынскай рэабілітацыі, якое раней знаходзілася тут, не закрытае, а з 1 студзеня 2025 года перанесена на плошчы структурнага падраздзялення «раённая бальніца» ў горадзе Ветка, — каментуе галоўны доктар Веткаўскай ЦРБ Крысціна Бондарава. — Пры гэтым яго ложкавы фонд павялічаны да 30 ложкаў, плануецца далейшае пашырэнне. Умовы для пацыентаў толькі палепшыліся: ім не прыйдзецца ехаць у Свяцілавічы, што ўскладняе лагістыку для людзей з іншых раёнаў.
Як гэта адаб'ецца на вёсцы Свяцілавічы, а таксама пра чуткі аб нядоўгім існаванні там аддзялення сястрынскага догляду, прапагандысты нічога не напісалі.
Цяпер чытаюць
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца1515
Каментары