Беларус прыехаў на мяжу з Польшчай, выйшаў падыхаць, а аўтобус з рэчамі знік з чаргі. Што было далей
Мужчына стаў ахвярай схемы перавозчыкаў, якія прывозяць на мяжу людзей і з’язджаюць, калі ўсе яны перасаджваюцца ў аўтобусы ў пачатку чаргі, піша BGmedia.
У адным з прымежных чатаў беларус падзяліўся непрыемнай гісторыяй. Ён прыехаў на аўтобусе на мяжу Польшчы з Беларуссю і стаў у чаргу ў пункце пропуску «Тарэспаль». Мужчына выйшаў падыхаць, а калі вярнуўся, аўтобуса ўжо не было. Унутры засталіся рэчы і дакументы.
Першае паведамленне беларус напісаў у прымежным чаце днём 21 снежня, дадаўшы фота аўтобуса.
«Добры вечар. Можа, хтосьці ведае гэтага перавозчыка? З’ехаў аўтобус з калейкі, з рэчамі і дакументамі ў бок Варшавы».
На наступны дзень мужчына працягнуў: «Добры вечар. Учора пісаў пра аўтобус, які з’ехаў, рэчы і дакументы знайшліся. Зараз шукаю чалавека».
Рэчы і дакументы ўдалося забраць толькі праз два дні, 23 снежня: «Добры дзень усім. Учора, дзякуй богу, забраў рэчы і дакументы. Вадзіла, як заўсёды, ні пры чым. Усё скінуў на фірму, маўляў, быў сляпы, што рэчаў не заўважыў».
Некаторыя карыстальнікі чата не разумелі, як аўтобус мог з’ехаць з чаргі.
Ім патлумачылі: «Мужык выйшаў пажаваць у кавярню, а яго аўтобус з’ехаў з чаргі назад у Варшаву з усім яго багажом. Вадзіла прывёз, выгрузіў усіх і паехаў назад, калі зразумеў, што ўсе яго пасажыры злінялі наперад на падсадку. Гэта проста барыга, які тыпу з тураўтобусам на ажыятажы падзарабіць прыехаў. Калі іх прыбраць — будзе менш чэргаў».
Такая праблема была некалькі дзён таму, калі перад пунктам пропуску «Тарэспаль» у чарзе сабраліся дзясяткі аўтобусаў. Беларусы прыязджалі на мяжу і перасаджваліся ў тыя аўтобусы, што стаялі бліжэй да шлагбаума. Дакладна такая ж схема працуе, калі ёсць чэргі перад пунктам пропуску «Брэст».
Беларусы расказалі ў чаце, як працавала гэтая схема і як на ёй зараблялі кіроўцы: «Мы так ехалі: замест нас з раніцы ў чарзе стаяў іншы аўтобус. Мы прыехалі і сталі замест яго, а ён развярнуўся і паехаў назад дадому».
«Яны займаюць чаргу, ставяць бус на 20 чалавек, а перад мяжой мяняюць яго на аўтобус на 50+ месцаў. У выніку тыя людзі, якія прыехалі пазней, апынаюцца ў глыбокай дупе. Плюс перасадка каштуе 50 еўра, вось і лічыце. Але бог з ім, хочаце — плаціце… Але што рабіць мамам з маленькімі дзецьмі? Людзі, пакуль мы не пачнём думаць адно пра аднаго, быць салідарнымі, мы ўсе будзем у брудзе».
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль3
Каментары