Прынцэсы Кэтрын і Шарлота сыгралі дуэтам на калядным канцэрце ў Лондане
Прынцэса Уэльская грала толькі левай рукой, а яе дачка — толькі правай.
Прынцэса Уэльская разам з дачкой Шарлотай выканалі фартэпіянны дуэт на калядным канцэрце, піша Бі-бі-сі.
Яны выканалі твор шатландскага кампазітара Эрланда Купера. Запіс быў зроблены загадзя ў Віндзорскім замку на мінулым тыдні спецыяльна для каляднай трансляцыі мерапрыемства на канале ITV1.
Кенсінгтанскі палац заінтрыгаваў гледачоў перад пачаткам праграмы, апублікаваўшы відэа, на якім Кэтрын і невядомы на той момант музыкант іграюць на фартэпіяна, з подпісам «асаблівы дуэт…».
На запісе яны сядзяць ва Унутранай зале Віндзорскага замка за фартэпіяна і выконваюць Holm Sound — твор, які, як вядома, ім добра знаёмы і які яны з задавальненнем граюць разам дома.
Прынцэса Уэльская грала толькі левай рукой, а Шарлота — толькі правай.Музычны нумар суправаджаўся кадрамі прыбыцця гасцей на калядную службу: прынц Уэльскі і Кэтрын назіралі, як іх дзеці прывязвалі папяровыя стужачкі са сваімі імёнамі да «дрэва сувязяў» звонку абацтва, што сімвалізуе адзінства, дабрыню і агульныя каштоўнасці.
У закадравым тэксце відэа Кэтрын кажа:
«Па сваёй сутнасці Каляды кажуць пра любоў, якая праяўляецца ў самых простых і чалавечых формах. Не ў сентыментальных ці грандыёзных жэстах, а ў пяшчотных. У моманце, калі цябе слухаюць. У слове суцяшэння. У сяброўскай размове. У руцэ дапамогі. У прысутнасці. Гэтыя простыя праявы клопату могуць здавацца нязначнымі, але яны робяць свой унёсак у цудоўную мазаіку жыцця, да якой мы ўсе належым».
Для Кэтрын, якая здала экзамены па фартэпіяна і музычнай тэорыі, гэта не першы досвед выступлення на калядным канцэрце. На першым канцэрце Together at Christmas у 2021 годзе яна нечакана для публікі акампаніравала на фартэпіяна спеваку і аўтару песень Тому Уокеру падчас выканання яго каляднай кампазіцыі For Those Who Can't Be Here («Для тых, хто не можа быць тут»).
Арганізатары паведамілі, што тэма сёлетняга мерапрыемства — «сіла любові і адзінства» — была выбрана ў знак прызнання ўнёску людзей па ўсёй краіне ў развіццё грамадства. Паводле іх слоў, у свеце, які ўсё часцей адчуваецца раз’яднаным, свята заклікана нагадаць пра каштоўнасць любові ва ўсіх яе праявах.
Як адзначаецца, уключэнне дуэта ў праграму стала асабістай ініцыятывай Кэтрын і павінна было падкрэсліць важнасць чалавечых сувязяў.
«Той час, клопат і спачуванне, якія вы дорыце — часта ціха, без слоў і без чакання прызнання, — аказваюць сапраўды велізарны ўплыў на жыццё іншых», — напісала прынцэса ў лісце, укладзеным у кожны асобнік праграмы службы.
Каментары