У Лагойску пекар адмаўляецца прадаваць свой хлеб пакупнікам, у якіх ёсць сабакі

Дзядзя Міша (ці нават проста Мішаня) у Лагойску персона знакамітая. Мужчына пячэ хлеб у рускай печы па рэцэптах 200‑гадовай даўніны. Прадае наўпрост са свайго аўтамабіля, паркуецца звычайна недалёка ад святой крыніцы Мікалая Цудатворца.

Павялічыць

У 2018 годзе пекара рэкламаваў блогер Какабай. Ён характарызаваў мужчыну так: «Мегахарызматычны, падобны на Леаніда Канеўскага». Какабай жа і паведаміў, што ў Мішані сямейны бізнэс: ёсць аграсядзіба, жонка пячэ хлеб, дачка дапамагае як кур’ер, а тата гандлюе ў Лагойску і на рынку Валяр'янава.

Блогер не хаваў захаплення: казаў, што пра такіх людзей трэба фільмы здымаць. Хлебу, дарэчы, ставіў 8‑9 какабаяў.

Павялічыць

Але ж нядаўна Дзядзя Міша трапіў у скандал праз сваю клінічную нелюбоў да сабак. У яго Threads з’явілася папярэджанне: мужчына кажа, што прынцыпова не будзе прадаваць свой хлеб сабачнікам. Сцвярджае, быццам бы ён даў такое слова сваім «адэкватным пакупнікам».

Павялічыць

А раней у сацсетках з'яўляліся гісторыі сабачнікаў, якім пекар сапраўды адмовіўся прадаваць хлеб.

У мінулым кастрычніку пра непрыемны выпадак расказала мінская фатографка, якая прыехала ў Лагойск з мужам, дзецьмі і невялікім сабачкам. Сям’я пагуляла па парку ля царквы. Побач ёсць міні-рынак, дзе дзеці купілі маліны, а іх маці захацела набыць хлеб — ім гандляваў з машыны той самы Дзядзя Міша. Муж з сабакам у гэты момант стаялі ўбаку.

Гандляр катэгарычна адмовіўся прадаць хлеб. Як высветлілася, абурыла яго тое, што ён палічыў: сям’я з сабакам хадзіла да святой крыніцы ў парку.

«І тут я чую ад мужыка: «Для вас у мяне хлеба няма», — напісала фатографка ў Threads. — Я ў той час была з двума маленькімі дзецьмі. Мужык працягвае: «Вы хадзілі на крыніцу з сабакам. Яшчэ і дзяцей вучыце блюзнерству. Ідзіце прэч».

У аналагічную сітуацыю ў снежні трапіў і Вадзім, які паспрабаваў набыць у Дзядзі Мішы хлеб, калі ішоў з кавярні са сваім коргі: «Ёсць прыватнік, які займаецца продажам хлеба наўпрост са свайго ўніверсала. Мне стала крыўдна. Не праз тое, што я вельмі хацеў пакаштаваць хлеб, а праз тое, што мне адмовілі яго прадаць па прычыне: «Я вам не прадам хлеб, бо вы з сабакам».

Павялічыць

Threads Вадзіма набраў больш за 100 тысяч праглядаў і шмат каментароў. Знайшліся яшчэ людзі, якія таксама сутыкнуліся з дзіўнымі прынцыпамі пекара.

Адна жанчына напісала, што Дзядзю Мішу не спадабалася яе парфума, і мужчына заявіў, што ёй не толькі нельга панюхаць яго хлеб, але нават глядзець на боханы. У выніку ўсё ж прадаў.

Яшчэ адзін мужчына расказаў, што раней часта набывалі ў Дзядзі Мішы хлеб. Але аднойчы той пабачыў, як кліент з дзіцём корміць хлебам качак, і сказаў, што пасля такога больш ніколі не прадасць яму свой хлеб.

Павялічыць

На старонцы ў Threads гандляр расказвае і пра іншыя выпадкі сваёй прынцыповасці.

Напрыклад, Дзядзя Міша сцвярджае, быццам яму патэлефанавалі пяць гадоў таму беларусы з Францыі і папрасілі рэцэпт. Мужчына адмовіў, бо супраць таго, каб у краіне НАТА елі хлеб па яго рэцэпце.

На пытанне, што ж ён робіць у сацсетцы Threads, якая створана ў краіне НАТА, Дзядзя Міша адказвае: «Я тут, каб разбурыць НАТА. Мы зробім гэта». Прагназуе, што Францыя «пазбавіцца ад натаўскага бота» менш, чым праз 5 гадоў.

Дарэчы, сваю радзіму мужчына называе «Белоруссия» — бо Лукашэнка так дазваляе.

Ёсць у Дзядзі Мішы гісторыя і пра лесніка з Вашынгтона: «Сабраўся ён ляцець у Беларусь, падышлі мясцовыя габрэі і кажуць: «Ты ў Мінск?» — «Так!» — «За 30 кіламетраў ад Мінска ў Лагойску ёсць мужык, Мішаня зваць, хлеб прадае. Прывязі». У гэтым выпадку пекар гандляр усё ж вырашыў прадаць 10 боханаў — і нават ганарыцца тым, што яго хлеб елі ў краіне НАТА.

Павялічыць

Але, мяркуючы па допісах, менавіта сабачнікаў Дзядзя Міша не любіць больш за ўсіх. Лічыць, што праз заходнюю прапаганду «на вуліцах мы часцей бачым людзей з сабакамі і радзей з дзецьмі».

Ён заклікае славян не выкарыстоўваць слова «люблю» ў дачыненні сабак — замест гэтага раіць казаць «мне падабаецца сабака».

Дзядзя Міша бачыць сувязь сабачнікаў з ЛГБТ. Кажа, што людзей цяпер прымушаюць быць талерантнымі, каб яны не перашкаджалі сабачнікам будаваць сабачы свет: «Прыкладна так ствараўся ЛГБТ-свет і іншая трансгендарня. Спыніцеся!»

Абураецца ён і тым, што людзі ператварыліся ў «лакеяў сабак» і прыбіраюць за імі экскрэменты. У каментарыях Дзядзя Міша неяк тлумачыў, чаму з асцярогай ставіцца да тых, ад каго пахне парфумай: «Калі вы прыйшлі па хлеб і ад вас дэманстратыўна не пахне парфумай, якой людзі заглушаюць непрыемныя пахі, што ідуць ад іх саміх, вы мне прыемныя і не выклікаеце адмоўных эмоцый.

Не ад усіх, але бываюць выпадкі, калі ад людзей адкрыта смярдзіць сабачым гаўном. Пасля таго як яны прыбралі за сабакам, яны могуць вітацца з вамі, абдымаць вас, перадаючы гэтыя пахі. Я не буду і надалей прадаваць хлеб мажорам з дарагімі сабакамі».

Павялічыць

Таму Вадзіму з коргі Дзядзя Міша прысвяціў ажно некалькі допісаў (але ў выніку выдаліў актыўныя спасылкі на старонку мужчыны). Высветлілася, што гандляр палічыў яго мажорам:

«Мажоры з дарагімі сабакамі, вы выстаўляеце іх напаказ, ганарыцеся імі, марнуеце грошы на іх утрыманне. Больш за тысячу рублёў на месяц: корм, прышчэпкі, лячэнне, адзенне. А ў гэты самы час вашы бацькі, бабулі, дзядулі вядуць бездапаможнае існаванне, марнеюць у беднасці або жывуць у прытулках. Вадзім, вы дапамагаеце сваім блізкім? Увагай, лекамі? Калі вы ў апошні раз размаўлялі з бабуляй, дзядулем? А?».

• 7
• 3
• 16
• 73
• 3
• 0
• 8
• 0