Лукашэнка прызнаўся, што гэта ён папрасіў у Бога шмат снегу і мароз. І прапанаваў выяўляць ворагаў з дапамогай абраза
Лукашэнка на Раство падарыў храму ў Аколіцы абраз. І адразу ж знайшоў яму практычнае прымяненне.
Аляксандр Лукашэнка на Раство выступіў з амвона ў царкве ў вёсцы Аколіца Мінскага раёна. Спачатку палітык прызнаўся, што столькі снегу ў Беларусі выпала дзякуючы яму.
«Ну мы ж так хацелі, і я ў тым ліку Госпада прасіў, каб быў марозец і снег выпаў. Слухайце, ну так і атрымалася. Нават з запасам. Таму я рады, што ў нас снежная нарэшце зіма. Вядома, не тая зіма, што ў нашым дзяцінстве — нас не відаць было з-за сумётаў (у арыгінале — сугроба, НН), асабліва ў вёсцы. Але тым не менш сапраўдная зіма. Хай і жыццё ў вас будзе сапраўднае», — сказаў Лукашэнка.
У дар храму ён прывёз Мінскі абраз Божай Маці. І адразу ж знайшоў яму практычнае прымяненне. Лукашэнка лічыць, што гэты абраз дапаможа знайсці правільны шлях у заблытаным свеце.
«Шмат-шмат разоў я звяртаў вашу ўвагу на тое, што свет сёння вельмі складаны. Заблытаны да немагчымасці. Можа, нашая галоўная святыня і дапаможа нам у гэтым цёмным, заблытаным, незразумелым свеце знайсці нейкі правільны шлях. Гэта па-першае», — сказаў Лукашэнка.
Бачыць ён у абраза і яшчэ адну функцыю — ён павінен выяўляць патэнцыйных ворагаў.
«Архіважна! Таму дай бог, каб вам тут і ўсім нам гэтая ікона, гэтая нашая галоўная святыня дапамагала бачыць… Ну, ворагаў у нас, будзем лічыць, няма. А вось, не дай бог, патэнцыйных нейкіх нашых праціўнікаў мы павінны бачыць. І наша ікона, магчыма, нам дапаможа ў гэтым», — лічыць Лукашэнка.
На яго думку, летась у Беларусі была белая паласа. Але калі што раптам, ікона дапаможа ў горы і смутку.
«Жыццё ёсць жыццё. Як у нас кажуць, жыццё — гэта цяльняшка. І белыя, і цёмныя палосы. Дык вось не заўсёды бываюць белыя палосы. Хоць, трэба сказаць, што Гасподзь нас мілаваў і мы жывём у мірнай краіне. І гэта, зыходзячы з мінулага года, я б сказаў, гэта белая паласа. У нас сёння ёсць усё для таго, каб людзі маглі жыць, карміць сябе і сваіх дзяцей. Пры ўмове толькі адной — калі яны працуюць. Без працы нічога не будзе. Таму гэтая ікона даруе нам спакой і суцяшэнне. Навучае», — адзначыў Лукашэнка.
Яшчэ Лукашэнка выказаў надзею, што абраз будзе выхоўваць моладзь, якая ўжо іншая, і лячыць дзяцей.
«Мы будзем толькі рады. Для нас гэта важна. У нас дастаткова людзей, якім патрэбна дапамога. Хай пры дакрананні да гэтай іконы чалавек хай павольна, паступова, але ацаляецца», — адзначыў Лукашэнка.
Але ў цэлым ён заклікаў беларусаў дапамагаць сабе самім.
Цяпер чытаюць
«Засяроджуся на працы з ЗША». Ціханоўскі расказаў пра свае палітычныя планы на 2026 год21
Каментары