У Крупках продажы семак б’юць рэкорды. Але хто аб’ядае мясцовыя крамы?
У гэтым райцэнтры Мінскай вобласці з пачаткам зімы назіраецца сапраўдны бум продажу семак. Толькі ў адной сеткавай краме за дзень распрадаюць 50 кг гэтай прадукцыі. Прадаўцы разводзяць рукамі: купляюць адразу многа — мінімум па тры ўпакоўкі па 0,5 кг. А часам і больш.
Як толькі выпаў снег і ўдарыў мароз, у Крупскі раён прыбылі самыя фотагенічныя кліенты з добрым апетытам, піша «Мінская праўда».
У адным з двароў на ўскраіне горада — у садовым таварыстве «Новае Жыццё» — ужо не першы год каля кармушак разыгрываюцца сапраўдныя птушыныя спектаклі. Аказваецца, тыя самыя кілаграмы семак з крам ператвараюцца ў «меню ад шэфа» для птушак.
Мінчанка Аляксандра Шараева прыязджае на выхадныя на лецішча да свёкра і кожны раз арганізоўвае святочны пачастунак для птушак. Вось ужо пяць зім яна закупляе семкі (не смажаныя) і крупы вялікімі партыямі. Не забывае і пра іншыя ласункі.
— Сініцам — сырыя семкі і несалёнае сала, вераб’ям — ячмень. Галоўнае: нічога смажанага і ніякага хлеба! — дзеліцца Аляксандра.
Кармушкі з вялікіх пластыкавых бутэлек яна зрабіла сама. Насыпае, перакульвае і падвешвае, як на фота, і мінімум на 7 дзён птушкі забяспечаныя кормам. На такую гасціннасць на тыдзень ідзе да 3 кілаграмаў семак. А для асаблівых выпадкаў — напрыклад, каб зняць на відэа сойку і іншых рэдкіх птушак — «банкет» сервіруецца прама на накрыўцы ад рондаля.
У звычайным жыцці Аляксандра — швачка. А ў выхадныя дзяўчына становіцца сапраўднай «птушынай рэжысёркай». Каб злавіць жывыя кадры, яна ставіць тэлефон на штатыў проста каля кармушкі і адыходзіць.
— Птушкі звыкаюць да спакойнай абстаноўкі, перастаюць саромецца і лятаюць да «сталовай»: сварацца, дзеляць семкі і пазуюць, — расказвае яна.
А ў аграгарадку Замкі Алена Губанава арганізавала для птушак сытны «фастфуд». Паколькі ў гаспадарцы трымаюць парасят, для сініц заўсёды гатовы вялікі кавалак сала. Не адстае і маладое пакаленне.
У пасёлку Крупскім майстар лесу Новакрупскага лесніцтва Аляксандр Дуброў правёў для мясцовых школьнікаў урок пра тое, якімі павінны быць кармушкі і чым можна карміць лясных птушак зімой. Расказаў таксама, якая ежа ім супрацьпаказаная.
Дзеці ў школьным лясніцтве, якое працуе ўжо шмат гадоў пры школе, вучацца, што ў марозную пару карміць птушак трэба рэгулярна.
— Сініцы, вераб’і і гілі, іншыя птушкі запамінаюць «добрыя месцы» і разлічваюць на нас у самыя лютыя маразы, — дзеліцца ведамі і досведам Аляксандр. — Хлебам іх карміць нельга. А вось сырыя семкі, крупы і несалёнае хатняе сала, а таксама ягады —найлепшы пачастунак.
Актыўныя закупкі семак у Крупках — не прыкмета дэфіцыту. Гэта хутчэй знак добрых сэрцаў мясцовых жыхароў. Дзякуючы гарадской сетцы сацыяльных сталовых для птушак, а таксама «месцаў грамадскага харчавання» ў іншых населеных пунктах, зіма для іх праходзіць значна цяплей і сытней.
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек44
Каментары